Batys Qazaqstan oblysynda koronavirýs juqtyrǵan 44 naýqas jansaqtaý bóliminde jatyr, dep habarlaidy QazAqparat.
BQO densaýlyq saqtaý basqarmasy basshysynyń mindetin atqarýshy Arman Qalibekovtiń óńirlik kommýnikatsiialar qyzmeti alańynda ótken brifingide málim etkenindei, sonyń ishinde 40 adamnyń jaǵdaiy aýyr, tórteýi asa aýyr halde.
Naýqastardyń 29-y júrek-qan tamyrlary aýrýlaryna, 11-i qant diabetine shaldyqqan.
Invazivti jasandy tynys alý apparatyna 4, invazivti emes qurylǵyǵa 23 patsient qosylǵan.
Taldaý kórsetkenindei, koronavirýs juqtyrǵandardyń deni jáne aýyr halde jatqandar – vaktsina almaǵan turǵyndar.
Arman Talǵatulynyń aitýynsha, qazirgi tańda 1451 adam ambýlatorlyq em alýda. Oǵan qosa 1459 tósektik 20 infektsiialyq statsionarda 521 adam emdelýde.
Oblystyq jedel járdem stansasyna sońǵy táýlikte 914 qońyraý shalynsa, sonyń 133-i kovidke qatysty bolyp, 44-i statsionarǵa jatqyzyldy.
Indet bastalǵannan beri oblys boiynsha barlyǵy 35 277 adam tirkelip, sonyń 77,2 paiyzy (27 234) jazylyp shyqty.
Bulardyń 12 891-i statsionarlyq, 14343-i ambýlatorlyq em aldy. Kúni búginge deiin barlyǵy 683, sonyń ishinde biyl 514 adam koronavirýstan kóz jumdy.
«Oblysta 202 545 adam vaktsinanyń birinshi, 167 514-i ekinshi komponentimen egildi. Kúni keshe óńirde 30 060 doza (15 030-y – birinshi, 15 030-y – ekinshi komponent) «QazVac» vaktsinasy jetkizilip, meditsina mekemelerine taratyldy.
Búginnen bastap atalǵan vaktsinamen turǵyndar egilip jatyr.
Ekinshi komponentti 21 kúnnen keiin alý kerek. Ózimizdi jáne jaqyndarymyzdy koronavirýstan qorǵaýdyń eń senimdi ádisi egilý ekendigin umytpaiyq», dedi A.Qalibekov.
