Batys Qazaqstan oblysynda koronavirýs juqtyrǵandardyń deni Resei men Atyraýdan kelgen, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Gúlmira Kajýshevanyń brifingte málim etkenindei, óńirde osy kezge deiin 272 adam aýrýǵa shaldyqsa, sonyń 219-y – shetten kelgender.
Sonyń ishinde 164 adam (80 paiyzy) Reseiden, 54-i (20 paiyzy) – Atyraý oblysynan kelgender. Atyraýdan kelgenderdiń arasynda 53-i Teńiz ken ornynda jumys isteidi. Sondai-aq bir adam Germaniiadan kelgen. Tranzittik júk tasymaldaýshylar arasynda 7 adamnan koronavirýs anyqtalsa, sonyń tórteýi – Ózbekstan, ekeýi – Tájikstan, bireýi – Qyrǵyzstan azamaty.
Aýyrǵandardyń 190-y – BQO, 75-i – Qazaqstannyń basqa óńirleriniń turǵyndary.
Syrqattanǵandardyń ishinde 52 adam buryn koronavirýspen aýyrǵandarmen qarym-qatynasta bolsa, sonyń 43-i densaýlyq saqtaý mekemelerinde anyqtaldy.
«Oblysta kún sanap jazylyp kele jatqandar sany qýantady. Qazir olardyń sany 121-ge jetti. Degenmen óńirde karantindik shekteý sharalary 25 mamyrǵa deiin uzartylǵanyn eske sala otyryp, turǵyndardan sanitarlyq, gigienalyq talaptardy buljytpai saqtaýdy ótinemiz. Adamdar kóp jinalatyn jerlerden tartynǵan oryndy. Dúken, dárihanalarǵa barǵan jaǵdaida betperde, qolǵap kiiýdi umytpaý qajet», dedi G.Kajýsheva.
