Áleýmettik jeli arqyly taralǵan Jańaqala aýdanynda koronavirýs tirkeldi degen aqparat jalǵan. Bul týraly BQO taýarlar men kórsetiletin qyzmetterdiń sapasy men qaýipsizdigin baqylaý departamenti málim etti, dep habarlaidy "Ult aqparat".
Departamentten alynǵan málimetke qaraǵanda, 18 naýryz kúni Nur-Sultan qalasynan kelgen stýdent qyzdyń temperatýrasy kóterilip, tamaǵy qyshyǵan.
«Qazir qyzdyń temperatýrasy tústi. Jaǵdaiy qanaǵattanarlyq, dárigerlerdiń baqylaýynda. Kórineý jalǵan aqparat taratqan adamnyń qylmystyq jaýapkershilikke tartylatynyn eske salamyz», dep habarlady departamentten.
Jalǵan aqparattyń vatsap jelisi arqyly taralǵanyn Jańaqala aýdany ákimdigi de rastady.
«Juqpaly dertke jol bermeý maqsatynda Almaty, Nur-Sultan jáne basqa qalalardan kelip jatqan stýdentterdi tekserý jumystary júrgizildi. Koronavirýs anyqtalǵan joq. Qaýipsizdik sharalary negizinde bir adam baqylaýǵa alyndy. Áleýmettik jelige jalǵan aqparat taratpaý jóninde eskertip, tek resmi derekkózderge ǵana senýdi suraimyz», delingen ákimdikten kelgen habarlamada.
Eske sala keteiik, budan buryn BQO-da 89 adamnyń baqylaýda ekendigin jazǵan bolatynbyz.
