Batys Qazaqstan oblysynda kóktemgi sý tasqynymen kúres jumystaryna rezervte 1,5 mlrd teńge qaralyp otyr, dep habarlaidy "Ult aqparat".
BQO TJ departamenti tótenshe jaǵdailardy joiý basqarmasynyń bastyǵy Baqytjan Ihsanovtyń óńirlik kommýnikatsiialar qyzmeti alańynda málim etkenindei, qazirgi tańda 443 tonna janar-jaǵar mai, 88 myń dana qap, 22 myń tonna inertti materialdar qory daiyn.
Baqytjan Maǵzomulynyń sózine qaraǵanda, jarýshylar brigadalary úshin 6,820 mln teńge, aerovizýaldi zertteýler júrgizýge tikushaqty tartýǵa 16,7 mln teńge, qaptar satyp alýǵa 2,895 mln teńge kóleminde kelisimshart jasaýǵa qarajat kózdelgen.
Tasqyn sýlardyń ótýi boiynsha Aqtóbe, Atyraý jáne Reseidiń kórshiles oblystarymen boljamdar men jedel aqparatpen turaqty túrde almasý jumysy júrgizilýde.
Kóktemgi sý tasqyny kezinde tótenshe jaǵdaidy joiýǵa 2591 adam, 734 tehnika, 45 júzý quraly jáne 295 motopompa tartylmaqshy. Kúsh-quraldardyń daiyndyǵy «Kóktem-2021» respýblikalyq komandalyq shtabtyq oqý-jattyǵý barysynda tekseriletin bolady.
Kúni búgin barlyq ózender qysqy rejimde, jaǵdai turaqty.
«Qazirgi kezde qala men eldi mekenderden 461 myńnan astam tekshe metr qar shyǵarylyp, 1150 tekshe metr erigen sý soryldy. Jyl saiyn kóktemgi sý tasqyny kezinde aýla aýmaqtary men eldi mekender kóshelerin erigen sý basý qaýpi týyndaidy. Munyń sebepteriniń biri – qardy ýaqtyly shyǵarmaý. QR Ákimshilik quqyqbuzýshylyq kodeksiniń 505-babyna sáikes Oral qalasynda aýmaqty abattandyrý erejesin buzǵany, iaǵni qardy ýaqtyly shyǵarmaǵany úshin 4 kásipker jaýapkershilikke tartyldy», dedi B.Ihsanov.
