Batys Qazaqstan oblysynda kiik atqandardan memleket paidasyna 10,8 mln teńge óndirildi, dep habarlaidy "Ult aqparat".
BQO prokýratýrasynyń baspasóz qyzmetinen túsken málimetke qaraǵanda, S.A. jáne J.A. degen azamattar ótken jyldyń 22 naýryzynda Bókei ordasy aýdany Muratsai aýyldyq okrýgi «Álem» qystaǵynyń mańynda «Escudo Bombardier» qarshanasymen qýyp júrip, 3 bas kiikti atyp óltirip, múiizderin kesip alǵan.
Jánibek aýdandyq sotynyń 2018 jylǵy 20 maýsymdaǵy úkimimen atalǵan turǵyndar QR QK 337-baby (zańsyz ańshylyq) jáne 339-babyna (janýarlardyq paidalanýǵa tyiym salynǵan túrlerimen, olardyń bólikterimen nemese derivattarymen zańsyz ainalysý) sáikes aiypty dep tanylyp, 3 jyl 6 aiǵa bas bostandyqtary shektelip, olardan memleket paidasyna 10,8 mln teńge óndirilgen.
Alaida sottalǵandar osy ýaqytqa deiin sonyń tek 531 myń teńgesin ǵana tólegen.
Prokýrorlar atqarýshy qujatty tekserip, aqparattyq júieler arqyly boryshkerlerdiń menshiginde jer telimi, úii men avtokóliginen basqa 175 iri qarasy men 55 bas jylqysy bar ekendigin anyqtady.
Jánibek aýdany prokýratýrasynyń usynymy nátijesinde «Atqarýshylyq is júrgizý jáne sot oryndaýshylarynyń mártebesi týraly» Zańynyń 32, 66-baptarynyń tártibimen sot oryndaýshy múliktiń tizimdemesin jasap, olardyń barlyǵyna tyiym saldy.
Anyqtalǵan múlikti saýda-sattyqqa shyǵarý týraly habarlama berilgennen keiin boryshkerler qalǵan somany tolyǵymen ótedi.
Aita keteiik, biylǵy 23 maýsymda osy aýdanda Aqoba aýylynyń A. degen turǵyny «Adaibai» sý bógetine velosipedpen baryp, «IJ-54» myltyǵymen sý ishýge kelgen kiiktiń úsh tekesi men bir analyǵyn atyp alyp, memleketke 14 mln teńge zalal keltirgen.
Bul qylmystyq is te aýdandyq sotta qaralyp, QR QK 339-babyna sáikes A. aiypty dep tanylyp, 1 jyl 6 ai merzimge bas bostandyǵy shekteldi. Oǵan qosa 14 mln teńge memleket paidasyna óndirildi. Bul sot aktisi zańdy kúshine engen joq.
