Batys Qazaqstan oblysynda gaz aýa qospasy jarylyp, eki adam kúiik jaraqatyn aldy, dep habarlaidy QazAqparat.
BQO TJ departamentiniń baspasóz qyzmeti málim etkenindei, oqiǵa 3 jeltoqsan kúni saǵat 20.15-te Kaztalov aýdany Taldyqudyq aýylynda boldy.
Jeke úige «KAZGID» JShS gaz sharýashylyǵy qyzmetkerleri gaz peshin ornatyp jatqan kezde jarylys boldy.
Sonyń saldarynan qosymsha qurylystyń tóbesi qirap, tereze áinekteri byt-shyt boldy.
Gaz aýa qospasynyń jarylýynan Oral qalasynda turatyn 29 jastaǵy qyzmetker - 25 paiyz, 28 jastaǵy jigit 15 paiyz kúiik jaraqatyn aldy. Olardyń ekeýi de jedel járdem kóligimen Jalpaqtal aýylyndaǵy aýrýhanaǵa jetkizildi.
Qazirgi kezde oqiǵanyń jai-japsary anyqtalý ústinde.
