Kollaj: mgorod.kz
Batys Qazaqstan oblysy Bórli aýdany Aqbulaq aýylyna tasqyn sý kirip, 44 adam evakýatsiialandy, - dep habarlaidy Tengrinews.kz saity.
BQO TJ departamentiniń bastyǵy Ernur Ótegenovtiń aitýynsha, oqiǵa aýdan ortalyǵy Aqsai qalasynan 25-30 shaqyrym qashyqtyqta ornalasqan Aqbulaq aýylynda bolǵan.
Dambany buzyp ótken tasqyn sý aýyldyń eki kóshesine, aldyn ala málimet boiynsha onshaqty úige kirgen. Oqiǵa ornynan 44 adam kóshirilip, olardyń deni Aqsai qalasy men atalmysh aýyldaǵy týysqandaryna ornalastyrylǵan.
Departament bastyǵynyń málimetinshe, osyndai oqiǵa Qaratóbe aýdany Qorjyn aýylynda bolǵan. Qazirgi kezde sý qorshaýynda turǵan bul aýylmen qatynas úzilgen. Degenmen búgin ushyp shyqqan tikushaq Qorjynǵa da qonyp, kómekke muqtaj adamdarǵa járdem berildi.
Sol sekildi Syrym aýdanynda Óleńti ózeni kóterilip, Jympity aýylynda eki úige sý kirip, odan 6 adam shyǵaryldy.
"Oblysta Oral qalasyna qosa segiz aýdanda qaýip bulty seiile qoiǵan joq. Tótenshe jaǵdailar ministriniń ókimine sáikes Atyraý jáne Mańǵystaý oblystarynan 101 adam 29 tehnikamen kómekke kelmekshi. Bul qosymsha kúsh qaýipti aýmaqtarǵa bólinetin bolady", - dedi Ótegenov.
Oblys ákiminiń orynbasary Erjan Baltaev jergilikti atqarýshy organnyń rezervinen 1,8 milliard, sondai-aq tótenshe jaǵdailardyń aldyn alý, zardaptaryn joiý úshin 490 million teńge qarajat bólingenin jetkizdi.
"Eger jaǵdai kúrdelense, Kaztalov, Qaratóbe, Tasqala siiaqty aýdandarda da tabiǵi sipattaǵy tótenshe jaǵdai jariialanýy múmkin", - dedi Baltaev.
Bórli aýdany ákimdigi aýdan boiynsha barlyǵy 23 úige sý kirgenin habarlady.
