Oral-Aqsai joly boiynda «Folksvagen Sharan» avtokóligi jylqylarmen soqtyǵysty, dep habarlaidy QazAqparat tilshisi.
Oqiǵa keshe keshkisin Terekti aýdany Dolinnyi aýyly mańynda, aýdan ortalyǵy Fedorovtan 24 shaqyrym jerde oryn aldy.
Aýdandyq politsiia bólimi jergilikti politsiia qyzmeti bastyǵynyń orynbasary Baýyrjan Supyǵalievtiń aitýynsha, Oral men Aqsaidyń arasynda taksi esebinde júretin avtokólik jol boiyna shyǵyp ketken bes jylqymen túiisip, sonyń úsheýi mert boldy. Qalǵan ekeýi de mertikken. Adamdar aman. Jeńil-jelpi jaraqat alǵan.
Qazirgi kezde maldyń kimge tiesili ekeni anyqtalýda. Aldyn ala málimetke qaraǵanda, avtokólik qalpyna keltirýge kelmeidi.
Oblystyq densaýlyq saqtaý basqarmasynyń baspasóz hatshysy Ainagúl Saqposynovanyń sózine qaraǵanda, sanaviatsiiaǵa shaqyrtý saǵat 20.05-te túsken. Fedorovtan quramynda hirýrg, anesteziolog-reanimatolog, feldsher bar brigada oqiǵa ornyna jetti. Avtokólikte bolǵan úsh adam zardap shekken. Olardyń ekeýi jedel járdem kelgenge deiin basqa kólikke otyryp, ketip qalǵan. Al 1975 jylǵy er adam keýdesinen jeńil jaraqat alǵan, moiny kógergen. Aýrýhanaǵa jatýdan bas tartqan oǵan sol jerde kómek kórsetildi.
Aita keteiik, jol boiynda maldyń jii júretini belgili. Ásirese, jylqy qarańǵy mezgilde túsken jaryqqa qarsy shabady.
