Batys Qazaqstan oblysynda 757,183 mln teńgege 154 dana meditsinalyq qurylǵy satyp alý kózdelip otyr, dep habarlaidy "Ult aqparat".
Oblystyq densaýlyq saqtaý basqarmasynyń basshysy Bolatbek Qaiýpovtyń aitýynsha, aldaǵy kúzde koronavirýs indetiniń ekinshi tolqyny kelý múmkindigi boljanyp otyrǵandyqtan, óńirde soǵan aldyn ala qam jasalýda.
Atalǵan meditsinalyq qurylǵylarǵa qosa 37 sanitarlyq avtokólik alý, 200 oryndyq modýldi juqpaly aýrýlar aýrýhanasyn salý josparlanýda.
Respýblikalyq biýdjetten jeke qorǵanys quraldaryn alýǵa 287,7 mln astam qarajat bólindi. Al jergilikti qazyna esebinen meditsinalyq qural-jabdyq alýǵa 170 mln jýyq teńge qaraldy.
Qazirgi kezde koronavirýsqa shaldyqqandardy emdeý úshin 3445 tósek-oryn bolsa, sonyń 1823-i karantindik, 752-si provizorlyq statsionarda, 870-i juqpaly aýrýlar aýrýhanasynda. Kúni búgin bulardyń sany 891 tósek-orynǵa deiin qysqardy.
B.Qaiýpovtyń sózine qaraǵanda, statsionarlarda 159 meditsina qyzmetkeri jumys isteýde. Jalpy, oblysta 1687 dáriger, 6388 orta býyn qyzmetkeri bar. Biyl 64 dáriger óńirge keldi. Sondai-aq Batys Qazaqstan joǵary meditsina kolledjin bitirgen 104 maman iske kiristi.
Ókinishke qarai, 1201 meditsina qyzmetkeri indetke shaldyqty. Koronavirýsqa qarsy sharalarǵa tartylǵan qyzmetkerlerge ótemaqy tóleý úshin qurylǵan arnaiy komissiia 159 ótinishti qarasa, sonyń 101-i qanaǵattandyryldy. 13 materialǵa qatysty Densaýlyq saqtaý ministrligimen kelisilýde. Ótemaqy tóleý úshin material jinaý jalǵasýda.
«Kúzde JRVJ jáne tumaý órshitindikten, jergilikti biýdjetten 67 myń dana ekpe satyp alynýda. Qosymsha 83 myń dana ekpege ótinim berildi. Maýsymdyq aýrýǵa kovid qosylsa, jaǵdai kúrdelenip ketýi yqtimal. Sondyqtan qosymsha 590 tósek-oryn ázirlendi. Árbir meditsina mekemesinde eki aiǵa jetetin dári-dármek qory bar. 123 mobildi brigada jumysqa daiyn. Oblysta qazir 130 IVL apparaty, 451 ottegi kontsentratory, 172 Bobrov apparaty, 10 tomograf, 47 rentgen apparaty bar. Qajetti meditsinalyq jabdyq alý budan bylai da jalǵasady. Óńirde kún saiyn onshaqty adamnyń kovidpen aýyrǵany tirkelip otyrǵandyqtan, bosańsýǵa bolmaidy», dedi Bolatbek Amangeldiuly.
