Batys Qazaqstan oblysynda 464 myń dana maskany Máskeýge áketip bara jatqan júrgizýshi ustaldy, dep habarlaidy "Ult aqparat".
QR UQK Shekara qyzmeti departamentinen podpolkovnik Asqar Qazbekovtiń málim etkenindei, oqiǵa 17 sáýir kúni «Syrym» ótkizý beketinde oryn aldy.
Shekarashylar Almatydan Máskeýge bet alǵan, qazaqstandyq azamat aidap kele jatqan «VOLVO» avtokóligin teksergen kezde kýzovtyń durys plombalanbaǵanyn kórgen. Jóneltýshi mekeme «KazAltyn servis» JShS ilespe qujat pen shot faktýrada júkti jalpy salmaǵy 12 920 kg halyq tutynatyn taýarlardyń 20 túri retinde kórsetken.
Arnaiy tehnikalyq quraldarmen teksergende, shekarashylar túri men kólemi birdei 119 qoraptyń qujatta kórsetilgenmen sáikes kelmeitinin ańǵardy. Qoraptardy ashqan kezde odan bir ret qoldanylatyn 464 myń dana meditsinalyq maska shyqty. Onyń quny shamamen 55,932 mln teńgeni quraidy.
Qazirgi kezde materialdy BQO boiynsha ekonomikalyq tergeý departamentine berý josparlanýda.
Eske sala keteiik, budan buryn 406 myń dana maskany Qazaqstannan Reseige alyp bara jatqan júrgizýshiniń ustalǵanyn jazǵan bolatynbyz.
