Batys Qazaqstan oblysynda 40 myńdai turǵynǵa kommýnaldyq jeńildik kórsetiledi, dep habarlaidy "Ult aqparat".
Oblys ákimi Ǵali Esqalievtiń málim etkenindei, Memleket basshysynyń tapsyrmasyna sáikes tótenshe jaǵdai men karantin ýaqytynda jeńildik alatyn sanattarǵa jatatyn, kommýnaldyq qyzmet jetkizýshilermen kelisimsharty bar tutynýshylar úshin aiyna 15 myń teńge tóleý qarastyrylǵan bolatyn.
«Sońǵy kezde osy jeńildikke qatysty saýal jii túsýde. Kommýnaldyq tólem úshin 15 myń teńge turǵyndardyń emes, kommýnaldyq mekemelerdiń shotyna aýdarylady. Mysaly, sáýir aiy úshin túbirtek 10 mamyrǵa deiin keledi. Soǵan deiin kommýnaldyq tólem tólenedi. Oblysta jeńildik alatyn sanattarǵa jatatyn 39-40 myńdai turǵyn bar», dedi óńir basshysy.
Oral qalasy ákimdiginen túsken málimetke qaraǵanda, atalǵan jeńildikti I, II, III top múgedekteri, múgedek balalardy tárbielep otyrǵan otbasylar, kópbalaly otbasylar, Ekinshi dúniejúzilik soǵystyń múgedekteri men qatysýshylary jáne oǵan teńestirilgen tulǵalar paidalana alady.
Sondai-aq memlekettik nemese qoǵamdyq mindetterin, áskeri qyzmetin oryndaý, ǵarysh keńistigine ushýǵa daiyndyq nemese ushý kezinde, adam ómirin qutqarý jáne quqyq tártibin saqtaý kezinde qaza tapqan tulǵalardyń otbasylary, tómen jáne odan az zeinetaqy alatyndar, ataýly áleýmettik kómek alatyn azamattar, sonyń ishinde jalǵyzbasty zeinetkerler ótinim bere alady.
Tólemdi alý úshin tutynýshy aqparattyq júieler (elektrondy poshta: 15000@uralsk.kz) nemese call-ortalyq (109, 500-255, 8-771-068-58-53, 8-771-068-58-63) arqyly jeke sáikestendirý nómirin, áleýmettik dárejesin kórsete otyryp, ákimdikke ótinim berýi kerek.
Ákimdik usynylǵan derekterdi tekserip, málimetter ras bolǵan jaǵdaida tólemaqy aýdarylady.
Eske sala keteiik, budan buryn Batys Qazaqstanda kommýnaldyq qyzmetter baǵasy tómendegenin jazǵan bolatynbyz.
