Batys Qazaqstan oblysynda jeltoqsan aiynda 29 oqýshydan indet shyǵyp, bes mekteptegi 8 synyp karantinge jabyldy, dep habarlaidy "Ult aqparat".
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaevtyń óńirlik kommýnikatsiialar qyzmeti alańynda ótken brifingide málim etkenindei, olardyń 12-sinde aýrý belgileri bolǵan, qalǵan 17-sinde simptomsyz ótýde.
Koronavirýs bes mekteptiń 8 synybynda anyqtalýyna bailanysty naýqastarmen qarym-qatynasta bolǵan oqýshylar men muǵalimder úilerinde oqshaýlandy. Oral qalasy men aýdandardyń bas sanitar dárigerleriniń qaýlysyna sáikes bes mekteptiń 8 synyby karantinge jabyldy.
Oqýshylar aýrýdy otbasy músheleri men týysqandarynan juqtyrǵan.
Balabaqsha mekemelerinde jeltoqsan aiynda kovid tirkelgen joq. Sondai-aq, óńirdegi meditsinalyq mekemeler de shtattyq rejimde jumys isteýde.
Nurlybek Ermekulynyń aitýynsha, oblysta 1 jeltoqsannan beri barlyǵy 370 adamnyń aýyrǵany tirkelse, sonyń 215-i nemese 58,1 paiyzy Oral qalasynyń úlesine tiedi. Sol sekildi Bórli aýdanynda – 54, Báiterekte – 49, Aqjaiyqta – 10, Terektide – 7, Tasqalada – 6, Jańaqala men Bókei ordasynda – 5, Shyńǵyrlaýda – 4, Syrymda 1 adam syrqattanǵan. Jánibek pen Qaratóbe aýdandarynda bul aida indet tirkelgen joq.
Oblys boiynsha jalpy indet juqtyrǵandar sany 8447-ge jetip, sonyń 7505-i saýyǵyp shyqsa, 144-i kóz jumdy.
