Batys Qazaqstan oblysynda 10 mln-nan astam teńgeniń múlkin jymqyrǵan qaraǵandylyq turǵyndar ustaldy, dep habarlaidy QazAqparat.
BQO politsiia departamentiniń baspasóz qyzmeti málim etkenindei, kúdiktiler 29 qańtar kúni saǵat 04.00-de qolǵa tústi.
Oral-Atyraý joly boiynda Aqjaiyq aýdany Chapaev aýyly tusynda jalǵan memlekettik nómir taqqan, Qaraǵandy oblysynyń 1982 jáne 1985 jylǵy turǵyndary otyrǵan «Folksvagen Passat» avtokóligi toqtatyldy. Avtokólik salonyn qaraǵan kezde «Batys Qazaqstan elektr jelilerin taratý kompaniiasy» JShS Kaztalov aýdandyq elektr torabynan urlanǵan múlik tabyldy.
Munyń aldynda, 25 qańtar kúni belgisiz bireýler atalmysh mekemeniń aýmaǵyna zańsyz kirip, transformatordan qosalqy bólshekter urlap ketken bolatyn. Keltirilgen zalal kólemi – 1 mln 879 myń teńge.
Jedel tergeý is-sharalary barysynda kúdiktilerdiń Jánibek jáne Jańaqala aýdandarynda osyndai úsh qylmysqa qatysy bar ekendigi anyqtaldy.
Qazirgi kezde kúdiktilerdiń biri Kaztalov aýdany politsiia bóliminiń ýaqytsha ustaý izoliatoryna qamaldy.
QR QK 188-baby 3-bóligine (iri mólsherdegi urlyq) sáikes sotqa deiingi tergeý amaldary júrgizilýde.
Barlyq urlyq boiynsha keltirilgen zalal kólemi – 10 mln 829 myń teńge.
