Foto: «Ortalyq kommýnikatsiialar qyzmeti»
Batys Qazaqstan oblysynyń ákimi Nariman Tóreǵaliev orynbasary sybailas jemqorlyqqa qatysty aiyptalǵanda nelikten otstavkaǵa ketpegenin túsindirdi, dep habarlaidy Kazinform agenttigi.
Biyl tamyz aiynda Batys Qazaqstan oblysy ákiminiń orynbasary Erjan Baltaev qyzmettik ókilettigin asyra paidalanǵany úshin jumystan bosatylyp, jaýapqa tartylǵan edi.
«Bul másele qalai boldy? Áleýmettik jelide osyndai áńgime bolyp jatqanyn kórdik. Odan keiin orynbasarymdy shaqyryp, osy máseleni anyqtadym, qanshalyqty durys ekenin ózinen suradym. Biz komissiia qurdyq. Sol komissiia jumysynyń qorytyndysymen ol óziniń qyzmettik ókilettigin asyra paidalanǵanyn moiyndap, túsinikteme jazdy. Soǵan bailanysty men onyń teris qylyqtary úshin jumystan bosattym. Iaǵni sotqa deiin», - dedi Tóreǵaliev Astanada Ortalyq kommýnikatsiialar qyzmetinde.
Ákimniń ózi de otstavka jóninde oilanǵanyn atap ótti.
«Memlekettik qyzmet týraly zańǵa sáikes, eger meniń qaramaǵymdaǵy orynbasarym sol qylmysty jasaǵan merzim úsh aidan asyp ketken jaǵdaida 10 kún ishinde otstavkaǵa ótinim berýim kerek. Biraq ol qylmys jasalǵan kezde meniń kelgenime úsh ai bolǵan joq. Men 2022 jyldyń 2 jeltoqsanynda taǵaiyndaldym. Iaǵni aqpan aiynda meniń kelgenime tek 2 ai bolǵan. Al qylmys jasalǵan merzim úsh aidan asyp ketse, sáýir nemese maýsymda bolǵan jaǵdaida men otstavkaǵa keter edim. Sondyqtan zańǵa sáikes, otstavkaǵa ótinim bergen joqpyn. Zań bárimizge ortaq», - deidi ol.
Sonymen birge, óńir ákimi Erjan Baltaevpen bolǵan jaitty óte ókinishti ekenin, ózi jáne basqaryp otyrǵan ákimshiligi úshin óte uiat bolǵanyn aitty.
«Aldaǵy ýaqytta osyndai jaittardy boldyrmaý úshin biz Sybailas jemqorlyqqa qarsy kúres departamentimen birge jol kartasyn jasadyq. Oǵan qosa, sybailas jemqorlyqqa jaqyn, qarajat kóp júretin memlekettik organdarmen birlesken buiryq arqyly biz ishki aýdit júrgizip otyrmyz. Qurylys, bilim basqarmasy, osyndai negizder bolyp qalady degen basqarmalarmen jemqorlyqqa qarsy departamentpen birlesip, osyndai buiryqtar shyǵardyq. Ishki aýdit te júrgiziledi», - deidi Tóreǵaliev.
