Batys Qazaqstan oblysynyń ákimi Ǵali Esqaliev Orynbor jáne Saratov oblystarynyń gýbernatorlarymen onlain kezdesý ótkizdi, dep habarlaidy "Ult aqparat".
Orynbor oblysynyń gýbernatory Denis Paslermen kelissóz barysynda negizgi taqyryp Jaiyq transshekaralyq ózenin saqtap qalý baǵdarlamasy boldy.
Onda Ǵali Esqaliev Jaiyq ózeniniń máselesin sheshýdiń baǵdarlamasyn birlesip naqtylaý qajettiligin aitty.
Gýbernator Denis Pasler búginde Tabiǵi resýrstar ministrligi Resei Federatsiiasynyń Prezidentine baǵdarlamanyń daiyndyǵy jáne qarjylandyrý kózin anyqtaý týraly esep daiyndap jatqanyn atap ótti.
- Búginde óńirler arasynda ǵylymi yntymaqtastyq qarqyndy damyp keledi. Máselen, buryn batysqazaqstandyq ǵalymdar men Orynbor siyr eti institýtynyń qyzmetkerleri BQO-daǵy qazaqtyń aqbas tuqymdy iri qara tuqymyn ósirýmen birge ainalysqan. Osy yntymaqtastyqty qaita jandandyrý qajet dep sanaimyn. Sonymen qatar Batys Qazaqstan oblysy Resei ǵylym akademiiasy Ýral bólimshesiniń dala institýtymen, Resei Federatsiiasy biologiialyq júieler men agrotehnologiialar federaldy ǵylymi ortalyǵymen jumys isteýge de múddeli, - dedi BQO ákimi.
BQO et, transformator, polietilen qubyrlaryn eksporttaidy. Orynbor oblysynda azyq-túlik óndirisi jaqsy damyǵan. Ony Batys Qazaqstanǵa eksporttaýdyń bolashaǵy bar. Ǵ.Esqaliev eki aimaq arasynda iskerlik yntymaqtastyq klýbyn qurýdy usyndy.
Oblys ákimdigi Orynbor kásipkerleriniń BQO-nyń investitsiialyq jobalaryna qatysa alatynyn aita ketip, óńirde investorlarǵa barlyq jaǵdai jasalǵanyn atap ótti.
Kelissóz barysynda Bórli aýdanynyń turǵyndaryn mazalaityn másele de kóterildi. Bul Orynbor oblysynyń Tashla aýdanyndaǵy gaz ken ornyndaǵy gaz qaldyqtarynyń shamadan tys aýaǵa shyǵýy týraly boldy.
Ǵali Esqaliev osy másele boiynsha baqylaýdy kúsheitip, batysqazaqstandyq mamandarǵa gaz qaldyqtarynyń aýaǵa shyǵý mólsherin ólsheitin qurylǵylarmen jumys isteýge ruqsat berýdi usyndy. Orynbor oblysynyń gýbernatory oblys ákiminiń usynysyn qoldady.
Saratov oblysynyń basshysy Valerii Radaevpen onlain kezdesýdegi kelissóz taqyryby «Fomin» ótkizý pýnkti arqyly avtomobilderdi ótkizý jumystaryna daiyndyq týraly boldy.
V.Radaevtyń aitýynsha, Aleksandrov Gaidan «Fomin» beketine deiingi joldy jóndeý 2021 jyly bastalady. Jóndeý jumystary aiaqtalǵannan soń, «Fomin» ótkizý pýnktin avtokólikterge ashý josparlanyp otyrǵanyn jetkizdi.
BQO ákiminiń sózine qaraǵanda, iri qara mal etin atalǵan pýnkt arqyly ótkizý eki jaqqa da tiimdi jáne osy baǵyttyń úlken áleýeti bar ekenin aitty. Sondai-aq BQO tarapy bekettiń jumysy jandaný úshin qajetti infraqurylym salýǵa daiyn ekendigi aityldy.
Kezdesýde Ǵali Esqaliev eki aimaqtyń kásipkerleri arasyndaǵy iskerlik yntymaqtastyq klýbynyń jaqsy jumys jasap turǵanyn atap ótti. BQO-da indet órship turǵan kezde Saratov oblysynyń kásipkerleri jeke qorǵanys quraldaryn jetkizip, qoldaý kórsetti. Sondai-aq Saratov memlekettik meditsina ýniversitetiniń qyzmetkerleri men batysqazaqstandyq dárigerler arasynda kásibi keńes almasý joǵary deńgeide bolǵanyn atap ótti.
Gýbernatorlarmen bolǵan eki onlain kezdesý barysynda oblys ákimi Ǵ.Esqaliev epidemiologiialyq ahýal jaqsarǵan jaǵdaida, kelesi jyly ekologiialyq, sporttyq jáne mádeni is-sharalardy, eki jaqty saýda jármeńkelerin úzbei ótkizip turýdy usyndy.
