«Atameken» Ulttyq kásipkerler palatasy basqarma tóraǵasynyń orynbasary Eldar Jumaǵaziev aldaǵy bes jylǵa arnalǵan kásipkerlik damytýdyń jańa tujyrymdamasy usynylatynyn málim etti, dep habarlaidy QazAqparat.
«Biyl kásipkerlik qyzmetti 2020 jylǵa deiingi memlekettik retteý tujyrymdamasynyń aiaqtalatyny málim. Kásipkerlik qyzmetti memlekettik tiimdi retteýge baǵyttalǵan keiingi jyldardaǵy barlyq reforma osy tujyrymdamaǵa sáikes júrgizildi. Degenmen eldegi biznesti memlekettik retteýdi damytýǵa baǵyttalǵan júieli jumystarǵa qaramastan kelesi máseleler anyqtalyp otyr. Atap aitqanda, memlekettik organdardyń retteýshilik áserin taldaýdy júrgizýge beitarap kózqarastyń saqtalýy, keibir retteýshi organdardyń biznesti baqylaý júktemesin shamadan tys arttyrýy, tekserýlerdiń negizinen jazalaýǵa baǵyttalatyny baiqalady», - dedi Eldar Jumaǵaziev Úkimet otyrysynda.
Onyń aitýynsha zańnamalyq retteýge qaramastan aqparattyq talaptardyń, ártúrli esep berýlerdiń, biznes sýbektileriniń kópshiligine keń taralýy, zańnamadaǵy normalarǵa qaramastan ózin-ózi retteý salalarynyń nashar damýy da sezilgen.
«Osyǵan bailanysty aldaǵy bes jylǵa kásipkerlik damytýdyń jańa tujyrymdamasy usynylady. Jańa tujyrymdama tek retteý máselelerimen shektelip qalmai, kásipkerlikti damytý men qoldaý tetikterin qamtý kerek dep esepteimiz. Jańa tujyrymdamany ázirleýge daiyn ekenimizdi aitqym keledi», - dedi ol.
