Foto: Pexels.com
Týrizm jáne sport ministrligi týrizm salasynda kásipkerlik sýbektileri úshin memlekettik qoldaýdyń birneshe túrin usynady. Bul sharalar týristik ónimderdiń sapasyn arttyrýǵa, sondai-aq ishki jáne kelý týrizmin damytýǵa baǵyttalǵan, dep habarlaidy Ult.kz.
2022 jylǵy 1 qańtardan bastap týrizm salasyndaǵy kásipkerlik sýbektilerine memlekettik qoldaýdyń 7 túri qoldanylady. Atap aitqanda:
1. Kelý týrizmin yntalandyrýǵa arnalǵan sýbsidiialar
Kelý týrizmimen ainalysatyn otandyq týroperatorlarǵa sheteldik týristerdi tartqany úshin árbir adamǵa 15 000 teńge kóleminde sýbsidiia tólenedi. Bul úshin sheteldik týristiń elde keminde 4 kún, 3 tún toqtaǵany jáne eQonaq júiesinde tirkelgeni rastaý qajet.
2. Balalarǵa arnalǵan áýe biletterin sýbsidiialaý
Ishki týrizmdi damytý aiasynda 18 jasqa deiingi balalar el ishinde tegin ushady. Ol úshin ishki týrizm salasynda qyzmet kórsetetin týroperatordan týr satyp alý qajet. Mundai jaǵdaida týristik ónim quramyna engizilgen áýe biletteriniń quny 100% sýbsidiialanady.
3. Taý shańǵysy kýrorttary úshin jabdyqtar men tehnika satyp alý
Kásipkerlerge aspaly joldar, qar tazalaý tehnikasy, jasandy qarmen qamtamasyz etýge arnalǵan jabdyqtar satyp alǵany úshin memleket shyǵynnyń 25% ótep beredi.
4. Jol boiyndaǵy servis nysandaryn salýǵa jumsalǵan shyǵyndardy óteý
Motelder, janarmai quiý stantsiialary, tamaqtaný oryndary, dárihanalar jáne ózge de qyzmet kórsetý nysandaryn salýǵa jumsalǵan shyǵyndardyń 10%-y memleket esebinen óteledi.
5. Sanitarlyq-gigienalyq toraptardy (SGT) ustaýǵa arnalǵan sýbsidiia
Týristik aimaqtarda, avtomobil joldarynyń boiynda jáne erekshe qorǵalatyn tabiǵi aýmaqtarda ornalasqan sanitarlyq-gigienalyq toraptardy ustaýǵa ai saiyn 83 300 teńge kóleminde sýbsidiia tólenedi.
6. Týristik obektilerdi salý nemese jańǵyrtý shyǵyndaryn óteý
Týristik qyzmet kórsetý nysandaryn jáne týristerge qajetti baǵyttarda salynatyn nemese qaita jańǵyrtylatyn obektilerdi salý shyǵyndarynyń 10%-y sýbsidiialanady.
7. Týristik avtobýstardy satyp alýǵa arnalǵan ótemaqy
Syiymdylyǵy 8 orynnan asatyn (júrgizýshini qospaǵanda) avtobýstardy satyp alý shyǵyndarynyń 25%-y óteledi. Bul rette tehnika keminde 5 jyl boiy tek týristik maqsatta paidalanylýy tiis.
Atalǵan qoldaý sharalary ishki týrister aǵynyn ulǵaitýǵa, kásipkerlerge týristik ónimderdi damytýǵa, infraqurylymdy jaqsartýǵa jáne qyzmet sapasyn arttyrýǵa múmkindik beredi.
