Keleshekte mashina jasaý salasynda elektromobil bólshekterin shyǵarý trendke ainalady. Qazaqstan mashina jasaýshylarynyń VII forýmynda Ulttyq ekonomika vitse-ministri Jaslan Mádiev osyndai boljam aitty.
«Jyl basynan beri Qazaqstan boiynsha mashina jasaý salasynda 553 mlrd teńgeniń ónimi shyǵaryldy. Bul óńdeý sektoryndaǵy óndiris kóleminiń 10,6 paiyzyna teń. Saladaǵy eksport kólemi aqshaǵa shaqqanda 392 mln dollardy qurady. Ósim 65,4 paiyzǵa teń. Al import kólemi 5,7 mlrd dollarǵa jetti. Oilanatyn jaǵdai. Iaǵni, osynshama importty almastyrýǵa bolady degen sóz. Bul – úlken áleýet. 7 aidyń ishinde salǵa 6,3 trln teńge investitsiia tartylǵan.
Mashina jasaý salasyndaǵy daiyn tehnika men ónim usyný naryǵyn damyǵan elder baiaǵyda jaýlap alǵan. Bizdiń kásiporyndarǵa aralyq ónim usynýǵa bolady. Mysaly, elektromobil bólshekterin shyǵarý qajet. Ol úshin investorlardy elimizde Gigafactory qurýǵa tartýǵa bolady. Oǵan qajet paidaly qazbalar bizde jetkilikti», - dedi vitse-ministr.
Forým barysynda elektromobil naryǵyna qajet bólshekter men qurylǵylar shyǵarý mashina jasaý salasyndaǵy negizgi trendke ainalatyny týraly boljamdar aityldy. Máselen, Tesla kompaniiasy qazir atalmysh elektromobilge qajet batareialardy Aziiadan aldyrýǵa májbúr kórinedi. Jylyna 500 myń elektromobil shyǵarýdy josparlap otyrǵan alpaýyt kompaniia 2020 jyly osynsha kólemde batareia shyǵaratyn Gigafactory-dy iske qospaqshy.
