Memleket basshysy Qasym-Jomart Toqaevtyń tóraǵalyǵymen Atyraýda Ulttyq quryltaidyń úshinshi otyrysy ótýde. QR Parlament Senatynyń depýtaty Gennadii Shipovskih Memleket basshysynyń sózin keltirip, halyqtyń birigýin qoldaitynyn jetkizdi.
Otyrys bastala salsysymen Memleket basshysynyń myna sózderi eleń etkizdi:
«Ashyǵyn aitýymyz kerek, biz tarihqa kelgende kóbinese emotsiiaǵa berilip ketemiz. Ótken zamandy orynsyz qazbalaý jaqsylyq ákelmeidi, onyń paidasynan góri, ziiany kóp. «Óspeitin eldiń balasy ónbeitin daýdy qýady» dep beker aitpaǵan. Ótken is ótti, endi ony eshkim ózgerte almaidy. Ýaqyt eń ádil tóreshi ekenin umytpaiyq. Bizge bitpeitin daý-damai emes, myzǵymas yntymaq pen birlik kerek. Qazirgi tarihi kezeńde halqymyzdyń sózi de, isi de – bir bolýy qajet. Sondyqtan ziialy qaýym, eń aldymen, elimizdiń birligin nyǵaitýǵa basa nazar aýdarǵany jón. Aǵa býyn jas urpaqqa jol nusqap, baǵyt-baǵdar berýi kerek.
Elimizde kózi ashyq, kókiregi oiaý, oiy ushqyr, bilimdi jastar kóp. Biz olardyń boiyna asyl qasietterdi sińirýimiz qajet. Uly Abaidyń «Birińdi qazaq, biriń dos, kórmeseń, istiń bári – bos» degen sózi áli de ózekti bolyp tur.
Men ziialy qaýym ókilderiniń bir-birine árdaiym tilektes bolǵanyn qalaimyn. Ózara janashyr bolý, túptep kelgende, elge janashyr bolý degen sóz. Taǵy da qaitalap aitqym keledi: usaq-túiek áńgimeni qoiý qajet. Qazaqty bólip-jarýǵa bolmaidy. Biz jalpyulttyq deńgeide oilaýǵa umtylýymyz kerek».
