Ultymyz ben jurtymyzdyń jańa bolmysyn qalyptastyrý úshin bizge Abaidan asqan aqylshy joq. Bul týraly QR Memlekettik hatshysy Qyrymbek Kósherbaev Almatyda Dostyq úiinde ótip jatqan Prezident Joldaýyn talqylaý otyrysynda aitty, dep habarlaidy QazAqparat.
«Ultymyz ben jurtymyzdyń jańa bolmysyn qalyptastyrý úshin bizge Abaidan asqan aqylshy joq. Osynaý mártebeli mindet jolynda uly aqyn murasyna súienip áreket jasasaq, bereket tabatynymyz anyq. Biz izdegen barlyq saýaldyń jaýaby hakim Abaidyń ólmes óleńinde, saliqaly sózinde tur. Abai ańsaǵan qoǵam – oiy ozyq, sanasy sergek «tolyq adamnyń» tolyqqandy qoǵamy. Biz aqyn murasyna jáne ziialylar áleýetine súienip, osyndai qoǵam ornatýymyz kerek. Ol qoǵamnyń ulttyq ideiasy bilim men ilimge jeteleitin táýelsiz eldiń aǵartýshylyq ustanymy bolýǵa tiis. Ult bolmysyn jańǵyrtý barysynda Abaidy tolǵandyrǵan jaǵymsyz qasietterden arylýymyz kerek», - dedi ol.
Memlekettik hatshy ziialy qaýymnyń jańa kezeńdegi jańa missiiasy týraly aityp ótti.
«Qai dáýirde de qazaq ziialylary óz qoǵamynda mártebeli missiiasyn atqaryp keledi. Mysaly, ótken ǵasyrdyń alpysynshy jyldarynda qalamgerler ulttyń rýhyn kóterdi. Ult jazýshylary jylymyq kezeńde (ottepel) el múddesimen ózektes shyǵarmalardy ómirge ákeldi. Táýelsizdiktiń alǵashqy jyldarynda ziialylar halyqty bereke-birlikke shaqyrdy, ulttyq qundylyqtardy túgendep, tarihymyzdy jańǵyrtýǵa ólsheýsiz úles qosty. Jańa tarihi kezeńde qazaq ziialylarynyń endigi mindeti – ult bolmysynyń jańa qaǵidattaryn qalyptastyrý, ult sapasyn arttyrýǵa atsalysý. Sizder – qazaq ziialylary – ulttyń uly maqsatyna adastyrmai aparatyn temirqazyǵy bolýlaryńyz kerek», - dedi Qyrymbek Kósherbaev.
.jpeg)