Aýyl sharýashylyǵyn tsifrlandyrylǵan tehnologiialarǵa kóshirý kezinde aýyl sharýashylyǵy mamandary da qaita jasaqtalady, dep habarlaidy QazAqparat tilshisi.
«Elbasy joldaýyndaǵy tapsyrmaǵa sáikes, biz bes jyldyń ishinde eńbek ónimdiligi men eksport kólemin 2,5 esege arttyrýymyz kerek. Onyń ishinde eń mańyzdysy - agroónerkásip keshenin tsifrlandyrýǵa kóshirý. Ol turǵyda biz jańa tehnologiialardy engize otyryp, dálme-dál eginshilikke kóshýimiz qajet» , - dedi QR Premer ministriniń orynbasary, QR Aýyl sharýashylyǵy ministri Ómirzaq Shókeev.
Aýyl sharýashylyǵy ministri AÓK-ti tsifrlandyrýda jańa tehnologiialardy qoldanýymen qatar, kadrlyq quram týraly da sóz etti.
«Almaty oblysy Qaskeleńdegi agrarlyq bazanyń jumys nátijesin kórip, bizde ǵylymnyń bar ekenine kózimiz jetti, degenmen ol jerde problema da joq emes. Mysaly, atalǵan ǵylymi bazada naqty jumys isteitin 50 ǵalym bar, qalǵan 200 adamnyń nemen ainalysatyny túsiniksiz. Sondyqtan, biz qazir ǵylymi institýttardaǵy shtat máselesin qaita qaraimyz. Iaǵni, naqty jumys nátijesin kórsetken ǵalymdar, onyń ózinde is júzinde olarǵa jaǵdai jasalady. Al jai qaǵaz jazýmen ainalysatyn ǵalymdar qysqartylady. Bul - ádil ári durys sheshim», - dedi Ó.Shókeev.
Shókeev, sonymen qatar, JOO-ǵa qatysty reformalar da júrgiziletinin sóz etti.
«Biz JOO-nyń sanyn emes, sapasyn arttyrýymyz kerek. Mysaly, 10 myń stýdent oqityn Qazaq ulttyq agrarlyq ýniversitetinde 1000 oqytýshy bar, sonyń kóp bóligi básekege qabiletti emes. Sol sebepti akademiialyq standartty kúsheitemiz. Básekege qabilettti emes JOO oqytýshylary ekstenshn júiesi boiynsha praktikalyq jumystarmen ainalysady. Al stýdentterge kelsek, olardyń úzdik degen 10%-na halyqaralyq standartqa sai keletin diplom beremiz», - dedi ol.
Sol siiaqty ǵylymi-zertteý institýttarynda da júielendirý jumystary júrgiziledi.
«Bizde qazir 20 ǵylymi-zertteý institýty bar, sony júielendirip, 12-sin ǵana qaldyramyz. Jáne árbir institýttyń óz bazasynda poligony bolýy kerek. Sonyń negizinde bazalyq sharýashylyqty damytýymyz qajet. Ǵylymi-zertteý institýttary jumystaryn qaǵazben emes, is júzinde kórsetýi tiis. Qazir bizde ǵalymdardan góri fermerler artyq biledi. Sondyqtan, aýyl sharýashylyǵymen ainalysatyn ǵalymdar institýt ishinde otyrmai, egin alqabynda júrýi kerek. Iaǵni, 70%-y jańa tehnologiialardy engizýmen, qalǵan 30%-y institýt ǵalymdarynyń oilap tapqan jańalyqtaryn engizýmen ainalysýy kerek», - dedi Ó.Shókeev.
Aita keteiik, búgin Aqmola oblysy, Shortandy aýdanyndaǵy A. Baraev atyndaǵy ǵylymi-óndiristik ortalyqta «Dálme-dál eginshiliktegi innovatsiialyq tehnologiialar» atty aýyl sharýashylyǵy mamandarynyń konferentsiiasy ótip jatyr. Konferentsiia jumysyna QR Premer ministriniń orynbasary, QR Aýyl sharýashylyǵy ministri Ómirzaq Shókeev pen QR Premer ministriniń orynbasary Asqar Jumaǵaliev qatysýda.
