Foto: Sputnik/Timýr Batyrshin
Bala quqyqtary jónindegi ýákil Dinara Zákieva imamnyń namaz kezinde kishkentai balany qolymen qaǵyp jibergenine qatysty pikir bildirdi, dep habarlaidy "Ult aqparat".
"Bul keshirýge bolmaityn qatygez áreket 24 sáýir kúni oryn alǵan. Video tek qazir ǵana paida bolyp, bul adamǵa qatysty qylmystyq is tirkeldi.
Osy jaǵdaiǵa qatysty Bas múfti Naýryzbai qajymen sóilestim, qatygezdik tanytqan adam búgin jumystan bosatyldy.
Onyń imam ekenine keler bolsaq, negizi Islamda áielderge, balalarǵa qurmetpen qaraý jáne qamqor bolýǵa qatysty kóptegen hadis pen aiattar bar. Mysaly, Muhammed Paiǵambar (s.ǵ.s) «onyń nemeresi namaz kezinde onyń basyna otyrǵan kezde, sájdeden basyn kótermegen».
Jalpy, maǵan IIM-nen respýblika boiynsha túrli zorlyq-zombylyq faktilerine qatysty derekter jinaqtamasy kúndelikti kelip turady. Biraq tirkelgen faktilerge qatysty aqparat qana. Al jazasyz qalyp jatqan faktiler qanshama, olar keiin kóp jaǵdaida qaiǵyly saldarlarǵa ákeledi" - dep jazdy ol áleýmettik jelidegi paraqshasynda.
Zákievanyń sózinshe, bizdiń árqaisymyz balalar qorǵaýshysy bolýymyz kerek.
"Eger siz bala qaýipte ekenin nemese onyń zorlyq-zombylyqqa ushyraǵanyn bilseńiz, ýákiletti organdarǵa jáne kelesi aidyń ortasynda jumys istei bastaityn 111 biryńǵai memlekettik bailanys ortalyǵy/senim telefonyna (aqparat mindetti túrde barlyq aqparat kózderinde, mektepterde ornalastyrylady) habarlasyńyz.
Qatygezdik pen zorlyq-zombylyqqa tózbeýshilik mádenietin biz osylai ǵana qalyptastyra alamyz" - deidi bala quqyqtary jónindegi ýákil.
