Búgin QR Ekologiia, geologiia jáne tabiǵi resýrstar ministri Maǵzum Myrzaǵaliev Atyraýda jergilikti ÚEU ókilderimen, ekobelsendilermen kezdesti, dep habarlaidy "Ult aqparat".
Ministr kezdesýde óńir ekologiiasyn jaqsartýǵa bailanysty belgilengen josparlardy tiimdi iske asyrý úshin birlesken jumysty kúsheitýdiń mańyzyna toqtaldy.
«Bizdi aimaqtaǵy ekologiialyq jaǵdai alańdatady. Atyraý elimizdiń eń lastanǵan qalalarynyń qataryna kiredi. Árine, bul jaǵdaidy jaqsartý qajet. Bul mańyzdy jumysta belsendi azamattar tarapynan qoldaý, kómek qajet. Men qashanda syndarly dialogqa ashyqpyn», - dedi ministr.
Maǵzum Myrzaǵaliev Atyraý oblysynyń ekologiialyq problemalaryn sheshý úshin 40 is-sharadan turatyn Jol kartasy ázirlengenin atap ótti. Olardyń qatarynda jańa kárizdik tazartý keshenderin salý jáne eskilerin qalpyna keltirý, «Sasyq sai» jáne «Sharshy» býlaný alańdaryn rekýltivatsiialaý, Oral ózeniniń basseinin kógaldandyrý, tazartý, saýyqtyrý jáne basqa da mańyzdy is-sharalar bar.
«Biz Atyraýdyń ekologtarymen, qoǵam ókilderimen birneshe ret kezdestik.
Kezdesýlerimizdiń nátijesi – Jol kartasyn qabyldaý. Jańa Ekologiialyq kodeks te osy baǵytta perspektivaly múmkindikter ashatynyn atap ótkim keledi. Eń mańyzdysy, kodeks iri lastaýshy kásiporyndardyń áleýmettik jaýapkershiligin arttyrýǵa múmkindik beredi», -dedi Maǵzum Myrzaǵaliev.
Onyń aitýynsha, qazirdiń ózinde 1-sanatqa jatatyn kásiporyndar eń ozyq qoljetimdi tehnologiialardy engizý boiynsha daiyndyq sharalaryn júrgizýdi bastady. Demek, bolashaqta atmosferaǵa lastaýshy zattardyń shyǵaryndylary aitarlyqtai azaiady.
Sondai-aq, ministr Atyraýda óńirdiń ekologiialyq problemalaryn tirkeitin front-ofis ashýdy usyndy.
