Qazaqstannyń Tuńǵysh Prezidenti Nursultan Nazarbaev Eýraziia elderiniń Parlament spikerlerin mańyzdy bir máselege nazar aýdarýǵa úndedi, dep habarlaidy Sputnik Qazaqstan.
"Búginde planetamyz qaitadan qaýipti shekaraǵa kelip qaldy. Jappai qyryp joiatyn qarýdyń kómegimen III Dúniejúzilik soǵys bastalsa, ol bizdiń órkenietimiz úshin sońǵy soǵys bolýy ábden múmkin", - dedi Nazarbaev Eýraziia elderi parlamentteri spikerleriniń IV keńesinde.
Elbasy byltyrdan beri Resei, Qytai, AQSh pen Eýropa odaǵynyń arasynda kelissózderdi bastaý qajettigin aityp kele jatqanyn eske saldy. Sebebi álemdegi tynyshtyq pen beibit ómir dál osy derjavalarǵa bailanysty.
"Búginde osy memleketterdiń arasyndaǵy teketires pen senimsizdik barlyq álemdi alańdatyp otyr. Dál osy derjavalar II Dúniejúzilik soǵystan keiin kelissózder ótkizip, Birikken ulttar uiymyn qurdy. I Dúniejúzilik soǵystan keiin de dál solai boldy. Menińshe, qazir sondai jaǵdai bolyp tur. Osy elderdiń basshylary adamzattyń bolashaǵy, halyqaralyq turaqtylyq pen qaýipsizdik úshin óz jaýapkershiligin sezinip otyr dep bilemin. Olar planetadaǵy shielenisti sheshýdiń joldaryn tabýy qajet", - dedi Nazarbaev.
Qazaqstannyń Tuńǵysh Prezidenti derjavalardyń dialogyn kúsheitý maqsatynda kelesi jyly Nur-Sultan qalasynda osy elderdiń Parlament basshylarynyń beiresmi kezdesýin ótkizýdi usyndy. Budan bólek, Nazarbaev Eýraziia elderi Parlament spikerlerin halyqaralyq kelisimderdi ratifikatsiialaýǵa úndedi. Máselen, klimat boiynsha Parij kelisimin áli kúnge deiin biraz memleket rásimdegen joq.
"Iadrolyq synaqtarǵa jáne iadrolyq qarý-jaraqqa tyiym salý siiaqty kelisimderdiń jaǵdaiy da sondai bolyp otyr. Iadrolyq derjavalardyń ol qarýdy jetildirip, kompiýterlik oiyndar siiaqty synaqtan ótkizip júrgeni durys emes. Ádildikke jatpaidy. Iadrolyq derjavalar osy bastamany birinshi bolyp kóterýi kerek. Onsyz másele sheshilmeidi", - deidi Nazarbaev.
