Qazaqstan Prezidenti «Astana» halyqaralyq qarjy ortalyǵy Sotynyń ǵimaraty men Halyqaralyq arbitrajdyq ortalyǵyn ashty, dep habarlaidy "Ult aqparat" Aqordaǵa silteme jasap.
Qasym-Jomart Toqaev saltanatty rásim barysynda Sot ǵimaraty men Halyqaralyq arbitrajdyq ortalyqty resmi túrde ashyq dep jariialap, qalyptasqan úrdiske sáikes arnaiy balǵamen soqqy jasady.
Qazaqstan Prezidenti óz sózinde zań ústemdigin saqtaý qaǵidaty ornyqty ekonomikalyq damýǵa jáne investorlarǵa degen senimge yqpal etetinin aitty.
– Biz zamanaýi, kásibi jáne derbes sot júiesin qalyptastyrýǵa erekshe kóńil bólemiz. «Astana» halyqaralyq qarjy ortalyǵynyń Soty men Halyqaralyq arbitrajdyq ortalyǵyn aǵylshyn quqyǵy qaǵidaty negizinde qurý arqyly biz «Astana» halyqaralyq qarjy ortalyǵynyń institýtsionaldyq qurylymyn jasaýdy aiaqtaimyz. Sonymen qatar, Tuńǵysh Prezident Nursultan Nazarbaevtyń negizgi bastamalarynyń birin júzege asyramyz, – dedi Memleket basshysy.
Qasym-Jomart Toqaevtyń aitýynsha, «Astana» halyqaralyq qarjy ortalyǵynyń qurylýy Qazaqstannyń álemniń damyǵan otyz eliniń qataryna qosylý úshin jasaǵan qadamdarynyń biri sanalady.
– Biz munyń biik maqsat ekenin túsinemiz. Ol turaqty ári sapaly ekonomikalyq ósimdi, ártaraptandyrýdy, jańa investitsiia men tehnologiiany tartýdy talap etedi. Biz reformalardan qoryqpaimyz. Sondyqtan, burynǵy KSRO aýmaǵynda alǵash ret aǵylshyn quqyǵy sot tóreliginiń jalpy júiesi aiasynda elimizde tabysty qoldanylyp otyr, – dedi Qazaqstan Prezidenti.
Memleket basshysy «Astana» halyqaralyq qarjy ortalyǵynda islamdyq qarjylandyrý, adam kapitalyn, innovatsiia men tsifrlandyrýdy damytý, startap-jobalardy qoldaý salalary boiynsha júzege asyrylyp jatqan jobalardyń mamandandyrylǵan kórmesin aralap kórdi. Sonymen birge, Qasym-Jomart Toqaev «Astana» halyqaralyq qarjy ortalyǵy birjasynyń jumysymen tanysty.
