Foto: parlam.kz
Májilistegi «Amanat» partiiasy fraktsiiasynyń jetekshisi Elnur Beisenbaev áleýmettik jelide orynsyz pikir jazǵan depýtat Anna Bashinskaia jóninde pikir bildirdi, dep habarlaidy QazAqparat.
«Anna Bashinskaia rasynda da partiia músheligine jańadan kelgen edi, 8-shi shaqyrylymda máslihat depýtaty atanǵan. Iá, abaisyzda qatelikke boi urdy. Ony moiyndady. Áleýmettik jelide pikirin bildirdi. Depýtattyq mandatyna bailanysty sheshimin shyǵaryp, depýtattyqtan ketti», - dedi ol Májilis kýlýarynda.
Beisenbaevtyń aitýynsha, saiasi organizm retinde partiiada da qatelikter bolýy múmkin.
«Ol partiianyń repýtatsiiasyna nuqsan keltirdi dep aita almaimyn. Partiia halyqaralyq isterge aralaspaidy. Biz ózge memleketterdiń prezidentteriniń málimdemelerine pikir bildirmeimiz. Bul – tikelei «Amanat» partiiasynyń pozitsiiasy», - dedi ol.
Aita keteiik, osyǵan deiin Almaty qalasy máslihatynyń depýtaty Anna Bashinskaia Ýkraina prezidenti Vladimir Zelenskiidiń «Deutsche Welle» basylymyna bergen suhbatynda Qyrymdy qaitarý týraly málimdemesine «Zelenskii myrza, Qyrymnan góri Túrkiia durys, ol jaqtyń aýa raiy qolaily», degen maǵynada pikir bildirdi.
Depýtattyń bul pikiri áleýmettik jeli qoldanýshylarynyń narazylyǵyn týdyryp, olar mandatyn tapsyrýyn talap etti.
Keiinirek Bashinskaia osy pikiri úshin qazaqstandyqtardan keshirim surap, mandatyn tapsyratynyn aitty.
