Búgin Astanala ótken «Qazirgi kezeńdegi ekstremizm men terrorizmniń aldyn alý men jolyn kesýdiń zańnamalyq jáne institýtsionaldyq sharalary» taqyrybyndaǵy «dóńgelek ústel» otyrysynda qoǵam belsendisi Muxtar Taijan terrorizmmen kúres jolynda sáláfizmdi tyiý máselesin kóterdi. Sondai-aq ol «ultshyldyq» degen túsinikten arylý qajettigin jetkizdi. Sebebi bul - otarlaý saiasatynyń psixologiiasy ekenin tilge tiek etti, dep xabarlaidy Baq.kz tilshisi.
«Shynynda, búginde ulttyq ideologiiany kúsheitý kerek. Ol ideologiia joǵary deńgeide bolsa, oǵan eshqandai sáláfitter qaýip tóndire almaidy. Ókinishke qarai, búgingi otyrys barysynda biz sáláfizm týraly múldem aitpappyz. Menińshe, qazirgi kezde biz orystandyrý saiasatynan arylyp, arabtandyrý aiasatyna boi aldyryp bara jatyrmyz. Óitkeni sáláfitterdiń aitýynsha, shelpek pisirýge bolmaidy, as berýge ruqsat joq, zirat basynda Quran oqýǵa da bolmaidy. Ol ne degen sóz? Qazaq bolma degen sóz emes pe? Sondyqtan ótkende Aqtóbedegi oqiǵalardan keiin Prezident te aitty ǵoi, oǵan sáláfitterdiń qatysy bolsa, oǵan tyiym salý qajet», - dedi M.Taijan.
Sondai-aq qoǵam qairatkeri ultshyldyq pen patriotizm máselesin shatastyrmaýǵa keńes berdi.
«Jańa baiandama jasaǵan Yqsanova xanym (depýtat - avt.) ultshyldyq týraly aitty. Biraq sońǵy 10-15 jylda men ondai másele jaiynda estigen emespin. Negizi, bizge «ultshyldyq» degen sózden arylý qajet. Sebebi bul - otarlaý saiasatynyń terminderi. Sol kezde Han Keneni, Alashordashylardy, jeltoqsanshylardy ultshyldar dep atady. Alaida artynan biz olarǵa eskertkishter qoidyq. Aqyr sońynda olar patriot bolyp shyqty», - dep atap kórsetti M.Taijan.
