Memleket basshysy Almaty qalasyndaǵy ekinshi jylý elektr stantsiiasyna bardy, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaev Aitqali Jaqutov atyndaǵy ekinshi jylý elektr stantsiiasynda boldy.
Prezident stantsiia aýmaǵynda jańadan salynatyn qýaty 600 MVt bolatyn bý-gaz qondyrǵysynyń qurylysyna daiyndyq jumystarymen tanysty.
«Samuryq-Qazyna» UÁQ» AQ basqarma tóraǵasy Almasadam Sátqaliev Prezidentke qalalyq energetika keshenin jańǵyrtý nátijesinde aýaǵa taraityn ziiandy qaldyqtar 2026 jylǵa qarai jylyna 50,4 myń tonnadan 6,7 myń tonnaǵa deiin azaiatyny týraly málimet berdi.
Sodan keiin energiia keshenine aýqymdy jańǵyrtý jumystarynyń bastalǵanyn bildiretin estelik kapsýlasyn qoiýdyń saltanatty rásimi ótti.
Prezident sharaǵa qatysýshylardyń aldynda sóilegen sózinde jańa qondyrǵynyń qurylysy búkil qalalyq energetika keshenin jańǵyrtý jumystarynyń bastalǵanyn bildiretinin atap ótti.
– Aldaǵy bes jylda Almaty men Almaty aglomeratsiiasy turaqty energiiamen jáne jylýmen qamtamasyz etiledi. Belgilengen jospardy júzege asyrý turǵysynan alǵanda, Memleket basshysynyń ózi osy kapsýlany qalap, tiisti jumystardy bastap bergeni úlken jaýapkershilik júkteidi, – dedi Prezident.
Osyǵan bailanysty Memleket basshysy «Samuryq-Qazyna» qorynyń tóraǵasy men qala basshylyǵyna, sondai-aq JEO qyzmetkerlerine barlyq jumysty merziminde jáne sapaly oryndaýǵa shaqyrdy. Sonymen qatar atalǵan óńir elimizdiń negizgi ekonomikalyq ortalyqtarynyń biri bolǵandyqtan, bul jumystardyń asa mańyzdy ekenin atap ótti.
– Eń bastysy, biz ekologiiany jaqsartyp, turǵyndardy taza aýamen qamtamasyz etemiz. Men úshin bul asa mańyzdy. Meniń tapsyrmam boiynsha Úkimet qalanyń aýasyn tazartý úshin qajetti sharalardy qabyldaidy dep almatylyqtarǵa ýáde berdim. Shyn máninde, birneshe jyl boiy qala turǵyndary ekologiianyń lastanýynan zardap shegip keldi. Biz bul máseleni túbegeili sheshýimiz kerek, – dedi Qasym-Jomart Toqaev.
Memleket basshysy jobanyń el Táýelsizdiginiń 30 jyldyǵy qarsańynda júzege asyryla bastaýynyń simvoldyq máni bar ekenin aitty.
– Bul bastama Almatynyń jasyl ári taza qala degen burynǵy mártebesin qaitaryp, turǵyndardyń ómir súrý sapasyn arttyratynyna senimdimin, – dedi Prezident.
Shara sońynda Qasym-Jomart Toqaev JEO-2 jumysshylarymen áńgimelesip, olardy búgingi aitýly oqiǵamen quttyqtady.
