Jýyrda el basshysy Qasym-Jomart Kemeluly Toqaev tiisti oryndarǵa jandaryń shyǵyp ketse de tájvirýs pen pnevmoniianyń statistikasyn biriktirińder dep pármen beripti. Mine, bul jańa bilikten biz kútken jaqsy jańalyq. Shyndyqqa shimirikpei qaraǵan basshy ǵana qiyndyqty eńsere alady.
Meniń bilýimshe, Toqaev – qoly taza adam. Jany, ary taza, antyna adal adamdardyń ǵana qoly taza bolady. Osynsha batpaqty keship júrip, dilin, qolyn bylǵamaǵan sondai adamnyń bizge basshy bolyp kelýiniń ózi qazaqqa Alla taǵalanyń oń nazaryn salǵanynyń basy dep bilemin.
Kim ne dese, o desin, bul - meniń óz paiymym! Meniń de eshkimge jaǵynyp, tilenip ómir ótkizbegenimdi elim, tipti bolmasa, Jaratýshy Iem biledi! Burynnan siresip tońǵan toń men syńysyp qalǵan seńdi qozǵaý ońai emes. Bul nardy jyǵyp, pildi búgip keterlik asa aýyr is! Odan eldiń birligi men erdiń tirligi ǵana qutqarady. Sol jolda mynaý tyǵyryq haldi, el kóńiliniń alańyn, qoǵamnyń aýanyn paidalanyp arzan ataq alyp qalýǵa umtylýdy toqtatqanymyz jón!
Ár jerden áýlikpei, júmilaǵa tóngen qasiretti Allanyń synaǵy, tipti kerek dese, bizdi táýbege shaqyrǵan meiirimi dep qabyldap, nietimizdi túzeiik! Duǵamyzdy dýaly aýyzdan shyǵaraiyq! Birjúrektilikke jetsek, biz jeńbeitin indet joq. Bul – burynǵy din de, búgingi ǵylym da dáleldep otyrǵan aqiqat!
Sondyqtan qiyn da syndarly kezeńde el bolyp el basshysyna járdemdeseiik! Toqaevtyń janynda toqailasaiyq! Sanamdy san sapyryp meniń tapqan aqylym – osy!
Svetqali NURJAN,
aqyn, «Qurmet» ordeniniń iegeri
