QR Aqparat jáne qoǵamdyq damý ministri Dáýren Abaev Facebook paraqshasynda «Biz birgemiz!» beinerolikter toptamasyn jariialady, dep habarlaidy "Ult aqparat".
«Búginnen bastap paraqshamda «Biz birgemiz!» beinerolikter toptamasyn jariialaimyn. Jobany bizdiń ministrlik «O.Ú.Media» prodakshn-stýdiiasymen birge «Habar» agenttiginiń qatysýymen jasady. Bul – qazaq óneri, ádebieti, bilim men aýyl sharýashylyǵy salasyndaǵy birtýar tulǵalar týraly kólemi shaǵyn, alaida máni tereń dúnieler. Ol tulǵalardyń barlyǵy da - qazaqqa ólsheýsiz eńbek sińirip, «ulttyq kodtyń» saqtalýyna, damýyna zor úles qosqan ózge etnos ókilderi», - dep jazdy ministr.
Onyń atap ótýinshe, beinerolikter Gerold Belger, Aleksandr Zataevich, Aleksandr Baraev, Nina Patrýsheva, Evgenii Brýsilovskii jáne taǵy da birqatar qairatkerlerdiń oqiǵalaryn baiandaidy.
«Ózderińiz biletindei, Alǵys aitý kúni taiap qaldy. Ol – birlik pen meiirim merekesi, Qazaqstan halqynyń ortaq tarihymyzǵa salaýat aityp, keleshekke yntymaqty amanat etetin meiramy. Biz de osy jobamyz arqyly babalar erligin balalar jadynda jańǵyrtýdy jáne búgingi egemen elimizdi qurýǵa atsalysqan barlyq jandarǵa alǵys aitýdy maqsat ettik», - dedi Dáýren Abaev.
