Biz áli kúnge deiin keńestik zamandaǵy 1942 jylǵy (SK-42) koordinattar júiesin qoldanyp kelemiz. Sondyqtan qazir zamanǵa sai memlekettik koordinattar júiesin jasaýǵa den qoiyp jatyrmyz. Bul úshin spýtniktik geodeziialyq jeli bazasyn salyp, jelini dál esepteý jáne teńestirýdi iske asyrý qajet.
Bul týraly búgin óziniń Facebook paraqshasynda QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jazdy, dep habarlaidy "Ult aqparat".
«Kúlli álem spýtniktik ádiske kóshken. GPS pen Jahandyq navigatsiialyq spýtniktik júie (GNSS) ǵaryshty sharlap júr, al geolokatsiiany smartfon arqyly jiberý qalypty jaǵdaiǵa ainalǵan.
Osyndai qarqyndy tehnologiialyq damýdyń arqasynda ǵalamat nátijelerge qol jetkizýge bolar edi. Alaida mundai múmkindikti 2GIS, Google kart, Iandeks taksi jáne taǵy basqa qarapaiym servister arqyly kúndelikti kúibeń tirlikte ǵana qoldanyp kelemiz. Osyndai qolda bar navigatsiia boiynsha salynǵan baǵdarǵa sai 200 metr nemese 212 metrden keiin buryldyńyz ba, meili, eń bastysy dittegen jerińizge jetseńiz boldy.
Al biz úshin qazirgi mańyzdy maqsat - SK-42 siiaqty kóne júieniń ornyna dala men qala, ózen-kól men orman kadastrynyń, geologiia jáne jer qoinaýyn paidalaný, tabiǵat, qorǵanys, qaýipsizdik siiaqty jáne taǵy basqa da tiisti salalardy, jerimizdiń árbir súiemi men elisi, ár santimetrin qamtityn memlekettik deńgeidegi ózimizdiń spýtniktik koordinattar júiemizdi qurý.
Jańa júiege aýysqan shaqta fermerlerdiń jer aýmaǵy ulǵaiyp nemese azaiyp, ózgerýi yqtimal. Mysaldar jetip artylady, eski koordinattar júiesindegi málimetter dál jáne naqty bolmaǵandyqtan, bir joldyń boiyndaǵy jer telimderi de sáikespei qalýy múmkin.
Memlekettik júiedegi shekteýler men kedergilerdiń kesirinen geologiia jáne jer qoinaýyn paidalaný salasyna sheteldik investorlardy tartý qiyndap tur. Memlekettik basqarýǵa da keri áserin tigizýde. Máselen, sáýlet salasyndaǵy «qyzyl jolaqtardyń», tabiǵat paidalanýdaǵy sanitarlyq jáne sý qorǵaý beldemderiniń buzylýy.
Qazirgi zamanda kóne SK-42 júiesin qoldaný degenimiz, mysaly 2021 jyly iri korporatsiianyń ieliginde zamanaýi tehnikalar men Internet bola tura, elektrondyq poshta, portaldar, smartfon men gadjetterin paidalanbai, hat-habarlary men qujattaryn qaǵaz júzinde jaiaýlap-jalpylap dástúrli poshta arqyly joldaǵanmen teń. Mundai korporatsiianyń jumysy jemisti bolýshy ma edi?!
SK-42 tehnologiiasy qurylys, sáýlet, geologiia, kadastr, kólik, navigatsiia jáne t.s. tehnikalyq jáne injenerlik baǵyttarda keńinen qoldanylady, sondyqtan onyń shyǵyndary da ushan-teńiz.
Osy sebepti bul salany jańǵyrtyp, zamanǵa sai jáne tiimdi qylyp, halyqqa kórsetilip jatqan qyzmetterdiń sapasyn arttyrý úshin geodeziia jáne keńistiktik derekterdi tsifrlandyrý qarqynyn kúsheitkeli jatyrmyz», - dep jazdy ol.
