Qazaqstanǵa sheteldik jumys kúshin (budan ári – ShJK) tartýǵa jyl saiynǵy kvota jumys berýshilerdiń qajettiligi negizinde aǵymdaǵy jyly jumys kúshiniń sanyna qatysty 0,31%-dy nemese 29,3 myń adamdy qurady, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Búgingi kúni 1,7 myń kásiporynda 14,6 myń sheteldik azamat jumys isteidi, bul rette uiymdardaǵy qazaqstandyq qyzmetkerlerdiń úlesi 96%-dy quraidy.
2021 jyly ShJK tartýǵa berilgen ruqsattardyń ishinde kelesi sanattar bar: birinshi sanat boiynsha 1 354 ruqsat (basshylar jáne olardyń orynbasarlary), ekinshi sanat boiynsha 7 510 ruqsat (qurylymdyq bólimshelerdiń basshylary). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tiisinshe 12 235 adam jáne 4 170 adam. Sondai-aq maýsymdyq jumystarǵa 2 976 adam tartyldy.
Ótken jyly Memleket basshysynyń tapsyrmasyn oryndaý úshin, ishki eńbek naryǵyn bilikti emes sheteldik jumys kúshinen qorǵaý jáne qazaqstandyqtar úshin jumys oryndaryn saqtaý úshin ShJK tartý kvotasy 2019 jylmen salystyrǵanda 40%-ǵa qysqartyldy, bul rette jumys berýshilerdiń tapshy mamandyqtarǵa qajettiligin ótei aldy.
2020 jyly jergilikti atqarýshy organdar ShJK tartý úshin 17,3 myń adamǵa (bekitilgen kvotanyń 59%) mólsherinde jumys berýshilerge ruqsattar berdi jáne uzartty.
2020 jyly ShJK arasynan 30-dan astam adamdy tartatyn kásiporyndarǵa 71 tekserý júrgizildi, bul 608 buzýshylyqty anyqtaýǵa múmkindik berdi.
Tekserý nátijeleri boiynsha jumys berýshilerge 113 uiǵarym berildi, 8,4 mln teńgeden astam somaǵa 50 ákimshilik is qozǵaldy. Júrgizilgen jumystardyń qorytyndysy boiynsha ShJK tartýǵa 32 ruqsat keri qaitaryp alyndy.
Aita ketý kerek, 2019 jylmen salystyrǵanda 2020 jyly Eńbek jáne kóshi-qon zańnamasyn buzý sany azaidy (1006-dan 608 jaǵdaiǵa deiin), sondai-aq eńbekaqy tóleýdegi sáikessizdik 479 jaǵdaidan 1-ge deiin qysqardy.
