Qazaqstanda salyq mindettemeleriniń oryndalýyn baqylaý jumysy júieli túrde júrgizilip keledi jáne ol uiymdastyrýshylyq-quqyqtyq formasyna bailanysty emes.
Bul týraly QR Qarjy ministrliginiń Memlekettik kirister komitetiniń baspasóz qyzmeti habarlady.
Osylaisha, statistikalyq málimetterge sáikes, aǵymdaǵy jyldyń 10 aiynda kameraldyq baqylaý arqyly salyq tóleýshilerdiń esebinen 169 myń sáikessizdik anyqtalyp, olarǵa tiisti habarlamalar jiberilgen.
Memlekettik kirister komiteti kommertsiialyq emes uiymdardyń qyzmeti, salyq zańnamasyna sáikes, salyqtardyń jekelegen túrleri boiynsha salyq salýǵa jatpaitynyn eske saldy. Osylaisha, birqatar kiris korporativtik tabys salyǵy men qosymsha qun salyǵynan bosatylady.
Sondai-aq, grant qarajatynan tólengen tólemderge áleýmettik salyq salynbaidy. Aktivterge ielik etý kezinde kommertsiialyq emes uiymdar salyqtan bosatý nemese tómendetilgen salyq stavkasy túrinde salyqtyq jeńildikterge ie.
Komitetten atap ótkendei, mundai artyqshylyqtar atalǵan uiymdardyń qyzmetinde ashyqtyq men aiqyndyqty talap etedi.
Bul rette KEU Salyq kodeksiniń 29-babyna sáikes salyq organdaryna shetelden, halyqaralyq jáne sheteldik uiymdardan, sheteldikterden, azamattyǵy joq adamdardan aqshany jáne (nemese) múlikti qabyldaý, jumsaý týraly habarlaýǵa mindetti.
Aqshany jarǵylyq qyzmette kózdelmegen maqsattarǵa paidalaný faktisi anyqtalǵan jaǵdaida mundai kiristerge jalpyǵa birdei belgilengen tártippen salyq salynady.
Osyǵan bailanysty memlekettik kirister organdary salyqtyq jeńildikterdi qoldaný negizdiligine baqylaý jasaidy.
«MKK sonymen birge, Salyq kodeksiniń 29-babynyń talaptaryn buzý ótken jyldary anyqtalǵanyn atap ótedi. Máselen, 2018 jyly 4 fakt, 2019 jyly 6 fakt, 2020 jyldyń 9 aiynda 4 fakt anyqtaldy. Bul oraida, uiymdar buryn jariia etilmegen aqparatty kórsetetin qosymsha eseptilik usynýǵa quqyly», -delingen habarlamada.
