Elorda turǵyndary men qonaqtary úshin biylǵy Naýryzdyń orny bólek. Sebebi búgin olar Ulystyń uly kúnin Astanada emes, Nur-Sultanda qarsy alyp jatyr, dep habarlady Sputnik Qazaqstan tilshisi.
Elorda tórindegi etnoaýyl jyldaǵy dástúrmen halyqqa lyq toldy. Aqshańqan kiiz úiler, myń burala bilegen burymdy qyzdar men kúresip, kúsh synasqan jigitter, asyq oinaǵan balalar, jastarǵa batasyn berip júrgen qariialar... Eńbektegen baladan eńkeigen kárige deiin kóterińki kóńil-kúide júr.
Tabiǵattyń jańarý merekesin qarsy alýǵa kelgender arasynda ministrler, teatr ártisteri, ákimdik qyzmetkerleri de bar. Bári de qazaqstandyqtardy Naýryz meiramymen quttyqtap, ystyq lebizin bildirip jatyr.
Premer-ministrdiń orynbasary Gúlshara Ábdiqalyqova Naýryz meiramynyń mańyzy erekshe ekenin atap ótip, ózi renjitken jandardan keshirim surady.
"Naýryz – bul jańarý meiramy. Elde aitýly oqiǵalar bolyp jatyr. Elbasy bastaǵan strategiia ári qarai jalǵasyn tabady. Eger úide nemese jumysta bireýdi renjitken bolsam, keshirim suraimyn. Jumysta kei kezde qatal bolatynym ras", - dedi ol.
Ulystyń uly kúnimen Prezident Ákimshiligi Ishki saiasat bóliminiń meńgerýshisi Aida Balaeva da quttyqtady.
"Biyl Naýryz meiramy erekshe. Búgin de aýa raiy meiirin tógip, jaqsy qarsy alyp jatyr. Sondyqtan halyq kóterińki kóńil kúide", - dedi ol.
Osy oraida Balaeva Astananyń Nur-Sultan dep ózgerýin qoldaitynyn jetkizdi.
"Kezinde osy astanany Almatydan kóshirgende de halyq senbep edi. Qazir mine osy qalada turyp, balalaryn ósirip, barlyǵy osy qalaǵa kelýdi armandaidy. Astananyń irgetasyn qalaýda Elbasynyń sińirgen eńbegi zor. Halqyna degen mahabbatymen, ystyq yqylasymen, el Astanasymen maqtansyn dep jasaǵan eńbegi. Sondyqtan, meniń oiymsha bul zańdylyq", - dedi ol.
Balaeva dostyq pen tatýlyqtyń merekesinde ózi renjitken adamdardan keshirim surady.
"Adam bolǵannan keiin renish bolyp turady. Biraq eń bastysy bir-birimizge kek saqtamaimyz. Meniń oiymsha, Naýryzdyń filosofiiasy bir-birimizge jańa kózben, jańa kóńilmen qarap, renishtiń barlyǵyn artqa qaldyryp, ərqashanda bir-birimizge meiirim syilaýda jatyr. Ár adam keshirimshil bolýy kerek, sondyqtan men de renjitken adamdardy keshiremin", - dedi bólim meńgerýshisi.
22 naýryz meiramymen Eńbek jáne halyqty qorǵaý ministri Berdibek Saparbaev ta quttyqtady.
"Merekemen quttyqtaimyn! Eń bastysy, elimizde tynyshtyq bolsyn! Barlyq otbasyǵa basqyt tileimin", - dedi ministr.
Astana qalasy mádeniet basqarmasynyń basshysy Bolat Majaǵulov ta igi tilegin jetkizip, elordanyń jańa ataýyn qalai qabyldaǵanyn aitty.
"Barsha qazaq elin Ulystyń uly kúnimen quttyqtaimyn. Jańa meiram bizge tek tabys ákelsin. Elde úlken ózgerister bolyp jatyr, biraq qalai bolǵanda da, halyq birigip, jańa prezidentti qoldap, Elbasymyzdy eshqashan umytpai, osy Naýryz merekesin toilasa, odan artyq eshteńe bolmaidy. Óz basym astananyń ataýyn ózgertýdi qoldaimyn. Bul Elbasynyń bastaǵan bastamasy, ol kisiniń eńbegi zor. Búgingi Astana, búgingi Nur-Sultan qalasy - búkil Qazaqstannyń brendi", - dedi ol.
