Sońǵy jyldary Mańǵystaý oblysynda qýańshylyq beleń alyp, ásirese biylǵy jyl sharýalarǵa tym aýyr soǵyp otyr, dep habarlaidy "Ult aqparat".
Jaýyn-shashynnyń bolmaýy, tasymaldanatyn jem-shóptiń jetispeýi, ystyqtyń erte túsýi, munyń barlyǵy tórt túliktiń kútimine keri áserin tigizgeli tur.
Óńirdegi sharýalardyń jeke malyna qajetti azyq qamdaý úshin ótken aptada oblys ákiminiń tapsyrmasymen shuǵyl jumystar qolǵa alynǵan edi.
Elimizdiń ózge óńirlerinen jem-shóp satyp alyp, sharýalarǵa úlestirý úshin «Kaspii» ÁKK arqyly tiisti qarajat bólindi.
Sonymen qatar oblys ákimdigi tarapynan mal azyǵyn jetkizý, jaiylym men shabyndyq jerlerdi paidalaný boiynsha Qostanai, Batys Qazaqstan, Aqtóbe oblystarymen kelissózder júrgizilýde.
Osyǵan orai oblys ákiminiń orynbasary Ǵ.Niiazov bastaǵan jumys toby Aqtóbe oblysynyń Alǵa, Baiǵanin, Mártók, Muǵaljar, Qobda, Temir aýdandaryna arnaiy baryp, naqty kelisimshart jasaidy.
Al óńirdiń shalǵaiynda ornalasqan Beineý aýdanynyń ákimi sharýalarǵa kómektesý maqsatynda Aqtóbe oblysyna baryp, kórshi aýdan basshylarymen kelisimge keldi.
Beineý aýdanynyń ákimi B.Ábilov bastaǵan, quramynda aýyl sharýashylyǵy mamandary men depýtattar bar arnaiy delegatsiia Aqtóbe oblysy Baiǵanin aýdany ákimi Qairat Orynbasaruly Otarovpen aýdan ortalyǵy Qaraýylkeldi aýylynda kezdesý ótkizdi.
Kezdesýdiń basty maqsaty biylǵy qýańshylyq saldaryn joiý úshin mal azyǵyn daiyndaýǵa shabyndyq, shekaralas aimaqtarda maýsymdyq jaiylymdardy paidalaný máselelerin talqylaý boldy.
Qaraýylkeldidegi kezdesý barysynda Beineý delegatsiiasy kórshi aýdannyń tynys tirshiligimen tanysty, birqatar áleýmettik nysandaryn aralady, aýyl sharýashylyǵy ardageri Rahym Sembiǵaliev Mańǵystaý oblysymen shektesetin Aqtóbe oblysyna qarasty aimaqta Keńes úkimeti kezeńinde 1950-1993 jyldary Jetiqaq, Kóltaban, Múlki aman, Saroi t.b. jer-sýlaryn tarihi Beineý aýdanyna qarasty Sam, Syńǵyrlaý sovhozdarynyń malshylary eki jaqty kelisimmen jailaý retinde paidalanylǵany týraly derekter jetkizildi.
Áriptestik nátijesinde:
1. Jetiqaq jerin paidalanyp otyrǵan Beineý aýdanyna qarasty sharýashylyq ielerine túsinistikpen qarap, jer máselesin zańdastyrý;
2. Baiǵanin aýdanyna qarasty jerlerden shabyndyqqa jaramdy jerler bolsa, Beineý aýdanynyń shóp shabýshy brigadalaryna jer bólý;
3. Baiǵanin aýdanyna qarasty sharýalardan tiimdi baǵada jem-shóp satyp alý;
4. Shekaralas aimaqta dala órtterin boldyrmaý, aldyn alý jáne onyń saldaryn birigip joiý sekildi baǵyttarda kelesim júrgizilip, Memorandýmǵa qol qoiyldy.
