Biyldan bastap elimizdegi joǵary oqý oryndary men kolledjder túlekterge diplomdy elektrondy formatta beretin boldy. Bul týraly QR Bilim jáne ǵylym vitse-ministri Rústem Biǵaridiń qatysýymen ótken onlain brifingte aityldy, dep habarlaidy QazAqparat.
«Biyldan bastap barlyq joǵary oqý orny men kolledj túlekteri diplomdy qaǵaz túrimen ǵana emes, elektrondyq túrde alady. Barlyq normativti akti qabyldandy. Bul ne úshin qajet? Jumys berýshi men azamattarda diplomnyń jasandy emes ekenine, sapasyna qatysty suraqtar týyndap turatyny jasyryn emes. Diplomyn rastaý úshin jumys berýshi men jas mamannyń kóp ýaqyty ketedi. BǴM-ǵa jyl saiyn diplomnyń zańdy ekenin rastaý úshin 500 myńǵa jýyq ótinim keledi. Ony rastaý úshin kóp ýaqyt qajet», - deidi QR Bilim jáne ǵylym vitse-ministri Rústem Biǵari.
Onyń aitýynsha, búgingi tańda 1992 jyldan bergi 2,5 million diplom málimetter bazasyna engizilgen. Qazirgi ýaqytta joǵary oqý ornyn 1992 jylǵa deiin bitirgenderdiń tarihi málimetteri jinalyp jatyr.
«Biyl biz barlyq diplomdy tsifrlandyrdyq. Bilim jáne ǵylym ministrligi saitynan bazaǵa engizilgen diplomdy onlain rejimde tekserýge bolady. Jumys berýshiniń de, jumysqa turatyn azamattyń da ýaqyty men aqshasy únemdeledi. Endi diplomnyń zańdy ekenin rastaý úshin notariýsqa baryp, aqsha tóleýdiń qajeti joq. Jyl sońyna deiin bul jumysty tolyq aiaqtaimyz», - deidi ol.
