Memlekettik saqtandyrý aiasynda balalarǵa tegin qyzmet kórsetiledi. Bul týraly bastapqy deńgeide meditsinalyq kómek kórsetetin densaýlyq saqtaý uiymdary boiynsha baspasóz týrynda aityldy, dep habarlaidy "Ult aqparat".
«№2 qalalyq emhanada 18 jasqa deiingi 18 myń bala tirkelgen. Onyń ishinde 15 jasqa deiingi 16 617 bala, bir jasqa deiingi 821 bala bar», - deidi №2 qalalyq emhanadaǵy pediatriia bóliminiń meńgerýshisi Altyngúl Qolqanatqyzy.
Bul jerde balalarǵa vaktsina egý, profilaktikalyq tekseris, dári-dármek, taldaý jumystarynyń bári MÁMS aiasynda tegin kórsetiledi.
«1 qańtardan bastap bul qyzmet túrleriniń qatary ulǵaiyp jatyr, iaǵni budan bylai bizdiń emhana MÁMS aiasynda gormondardy taldaý, kompiýterlik jáne magnitti-rezonanstyq tomografiia, ońaltý jumystaryn ózi júrgize alady», - deidi ol.
Byltyrǵy osy ýaqytpen salystyrǵanda, biyl atalǵan emhanadaǵy ońaltý ortalyǵynan 34 bala em alyp shyqqan.
«Bul byltyrǵy osy ýaqyttaǵy kórsetkishke qaraǵanda úsh ese kóp. Buryn sal aýrýyna shaldyqqan, Daýn sindromy bar, aýtist balalary bar ata-analar arnaiy ońaitý ortalyqtaryna baratyn bolsa, qazirgi ýaqytta MÁMS aiasynda osy jerde ońaltý jumystarynan óte alady. Sondai-aq, bizde pediatriia salasynyń mamandary MÁMS arqyly tegin oqyp shyqty. Aqparattandyrý salasy boiynsha bizdiń medbikeler, dárigerler kúndelikti ózderiniń tirkelgen aýmaǵyndaǵy ata-analarmen aqparattandyrý boiynsha jumys istep jatyr. Olardyń 90%-y tolyq aqparattandyrylǵan dep aita alamyz», - deidi Pediatriia bóliminiń meńgerýshisi.
Emhananyń bas dárigeri atalǵan qyzmet túrlerin tegin alý úshin ata-ana ne isteýi kerek ekenin aitty.
«Ártúrli dertterine bailanysty dispanserlik esepke turatyn balalar bar. Osyndai ońaltý ortalyǵyna barý úshin bala men anasy ýchaskelik pediatrdyń joldamasyn alady. Odan keiin bala qai topqa baratyny, jylyna neshe ret keletini anyqtalady. Sosyn mýltidistsiplinarlyq top qurylady. Onyń quramyna reabilitolog, nevropatolog, psiholog pen logoped kiredi. Olar balaǵa ońaltý jumystaryn júrgizý úshin ne kerek ekenin, iaǵni ońaltý jumystaryna qatysty jeke jospar jasaidy. Kelesi qadam - mýltidistsiplinarlyq toptyń sheshim qabyldaýy. Sheshim qabyldanǵannan keiin naýqas balanyń ereksheligine, qandai kómek qajet ekendigine qarai em túri bastalady. Bir kýrs 1,5-2 aiǵa sozylady. Eger kýrsty qaitalap ótý qajet bolsa bala ekinshi jartyjyldyqta keledi», - deidi №2 qalalyq emhananyń bas dárigeri Lázzat Rýspekova.
