Biyl Kaspiide Iran men Reseige paromdyq qatynas ashylady. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Osy jyldyń 4 aiynda Aqtaý jáne Quryq teńiz porttary arqyly shamamen 2 mln tonna júk tasymaldandy. Konteinerlerdi aýystyryp tieýde ósim baiqalady. Qazirgi ýaqytta Aqtaý portynyń negizinde «konteinerlik hab» qurý jáne eksporttyq júkterdiń bir bóligin Transkaspii baǵdarlaryna aýystyrý boiynsha jumys júrgizilip jatyr. Osyǵan bailanysty ótken jyly mýltimodaldy tasymal kezinde Salyq kodeksine temirjol tarifterinen qosylǵan qunǵa salyqty alyp tastaý bóliginde ózgerister engizildi»,- dedi ministr.
Onyń atap ótýinshe, transkaspii halyqaralyq kóliktik baǵdary aiasynda Aqtaý – Baký fiderlik jelisi siiaqty Aqtaý porty men irandyq Kaspiian porty arasynda turaqty konteinerlik jeli iske qosyldy
«2025 jylǵa qarai konteiner aǵynynyń kólemin 135 myńǵa jetkizý josparlanǵan. Biyl Kaspiide birneshe paromdyq qatynas ashylady. Atap aitqanda bul baǵyttar: Quryq – Anzali (Iran) jáne Quryq – Mahachkala (Resei). 2025 jylǵa qarai Quryq porty arqyly júkti aýystyryp tieý kólemin 3,5 mln tonnaǵa jetkizý josparlanyp otyr», - dedi Beibit Atamqulov.
