2020-2021 jyldarǵa arnalǵan Jumyspen qamtý jol kartasy (JQJK) aiasynda biyl 331 joba iske asyrylatyn bolady. 2021 jyly barlyǵy 27,3 myń jumys ornyn qurý josparlanyp otyr, onyń 10,2 myńy turaqty jumys orny bolady, dep habarlaidy QazAqparat.
«Budan basqa, 2020 jyly iske qosylǵan 259 jobany iske asyrý jalǵasýda, onyń aiasynda 81 myńǵa jýyq adam jumysqa ornalastyryldy», - delingen Eńbek ministrligi málimetinde.
Iske asyrý tájiribesin eskere otyryp, JQJK-ǵa taldaý júrgizildi jáne mynalardy kózdeitin jańa tásilder ázirlendi:
– jańa turaqty jumys oryndaryn qurý úshin azamattardyń kásipkerlik bastamalaryn keńeitý;
– otandyq taýarlar óndirisin, qyzmetterdi damytý jáne jumys oryndaryn qurý úshin «Bastaý Biznes» jobasy túlekteriniń biznes-josparlaryn qarjylandyrýdyń (mikrokreditteýdiń) qoljetimdiligin arttyrý;
– JQJK-ǵa qurylys-montajdaý jumystary aiaqtalǵannan keiin turaqty jumys oryndaryn qurýdy qamtamasyz etetin áleýmettik-mádeni, injenerlik-kóliktik, óndiristik (indýstriialyq) infraqurylymdy jáne turǵyn úi-kommýnaldyq sharýashylyq obektilerin salý ári rekonstrýktsiialaý jónindegi jobalardy ǵana qosa otyryp, infraqurylymdyq jobalardy irikteý kriteriilerin qaita qaraý.
Esterińizge sala keteiik, 2020 jyly JQJK aiasynda 239 myńnan astam jumys orny quryldy, onyń 6,6 myńy – turaqty. Bul rette jumysqa ornalastyrylǵan azamattardyń 50,3 paiyzy halyqty jumyspen qamtý ortalyqtary arqyly jumys tapty, 6,5 myń infraqurylymdyq joba iske asyryldy. JQJK infraqurylymdyq jobalaryn iske asyrýdyń erekshe sharty - otandyq óndirýshilerdiń taýarlary men qyzmetteriniń keminde 90 paiyzyn qoldanýdy qamtamasyz etý. Qyzmetkerlerdiń keminde jartysyn halyqty jumyspen qamtý ortalyqtary arqyly jaldaidy, jumyssyz jastarǵa basymdyq beriledi. Merdigerler sanitarlyq-epidemiologiialyq sharalardy qoldana otyryp, qaýipsiz eńbek jaǵdailaryn qamtamasyz etýge tiis.
