Biyl qańtar-qyrkúiek aralyǵynda elimiz boiynsha vagon men lokomotiv óndirisi 50,5% ósken, dep habarlaidy QazAqparat.
Úkimet otyrysynda toǵyz aidaǵy ekonomikanyń ósimi týraly baiandama jasaǵan QR Ulttyq ekonomika ministri Áset Erǵaliev osyndai derekter keltirdi.
«Taýarlar importy 25,4 mlrd AQSh dollaryn qurady. Jalpy, oń saýda balansy ótken aiǵa qaraǵanda 1,7 mlrd AQSh dollaryna ósip, 12,1 mlrd AQSh dollaryn qurady.
Óńdeý ónerkásibi turaqty ósý úrdisin saqtap otyr. Qańtar-qyrkúiekte sala boiynsha óndiris kólemi 5,7% ósti», - dedi vedomstvo basshysy.
Onyń sózine qaraǵanda, jyl basynan bergi toǵyz aida 14 óńir boiynsha óńdeý ónerkásibi oń kórsetkish baiqatqan. Eń joǵarǵy ósý Almaty qalasy men Qostanai, Almaty oblystarynda baiqalyp otyr.
«Óńdeý ónerkásibi salalary boiynsha farmatsevtikalyq ónim óndirý 38,1%, mashina jasaý – 22,8%, onyń ishinde avtomobil jasaý – 31,6%, vagondar men lokomotivter óndirisi – 50,5%, sondai-aq qurylys materialdary – 10,1%, plastmassa buiymdary – 31,4%, daiyn metall buiymdary – 17,2%, kiim – 14% jáne jihaz – 14,9% deńgeiinde serpindi ósýdi kórsetip otyr», - dedi Áset Erǵaliev.
Sondai-aq, ol ótken 9 ai boiynsha oryndalǵan qurylys jumystarynyń kólemi 9,7% ósip, joǵary qarqyn kórsetkenin atady.
«Kórsetkishtiń oń ósimi barlyq óńirler boiynsha tirkeldi. Qurylys-montajdaý jumystarynyń eń joǵary ósýi Almaty qalasynda, sondai-aq Mańǵystaý jáne Aqmola oblystarynda baiqalýda», - dedi ministr.
