Biyl Ulttyq biryńǵai test tapsyrýǵa 130 myńnan astam talapker ótinish berdi. Bul týraly QR BǴM Joǵary jáne joǵary oqý ornynan keiingi bilim departamenti direktory Ádilet Toibaev aitty, dep habarlaidy QazAqparat.
«Biyl Ulttyq biryńǵai testileý 28 sáýirde bastalyp 14 mamyrǵa deiin jalǵasady. Ótinishterdi qabyldaý ádettegidei Ulttyq testileý ortalyǵynyń saitynda júrgizilip jatyr. Osy kúnge deiin 130 myńnan astam talapker óz ótinishterin berip úlgerdi. Osy jyldyń túlekteri úshin asa mańyzdy jańalyqtyń biri - ol talapkerdiń eki ret negizgi UBT tapsyrýǵa múmkindik berilip otyr. Demek, UBT kezinde testileýshiniń test tapsyrýǵa eki múmkindigi bar. Ekeýiniń biriniń nátijesin tańdap, konkýrsqa qatysa alady. UBT 16 mamyr men 5 shilde aralyǵynda ótedi», dedi departament direktory Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, negizgi UBT-ǵa orta bilim berý uiymdarynyń osy jylǵy túlekteri; orta bilim berý uiymdarynyń ótken jylǵy bitirýshileri men tehnikalyq jáne kásiptik nemese orta bilimnen keiingi bilim berý uiymdarynyń bitirýshileri jáne basqa da sanattaǵy talapkerler qatysa alady.
«Pánderdiń sany ózgerissiz qalady – úsh mindetti jáne eki tańdaý boiynsha. Tapsyrmalarynyń sany – 120. Ózgeris bolǵan joq. Onyń ishinde Qazaqstan tarihynan - 15, matematikalyq saýattylyqtan - 15, oqý saýattylyǵynan - 20 jáne eki beiindik pánnen 35 suraqtan bolady. Eń joǵarǵy upai sany – 140. Testileýdiń jalpy ýaqyty – 4 saǵat», dedi dedi Ádilet Toibaev.
