2017 jyly Turǵyn úi qurylys jinaq bankiniń 8 600 salymshysy «Nurly jer» baǵdarlamasynyń aiasynda baspanaly boldy.
Atalǵan baǵdarlama aiasynda Turǵyn úi qurylys jinaq banki jelisi boiynsha 8 672 páterden turatyn 145 páter paidalanýǵa berilgen. Jaqyn arada 4 879 páterden turatyn taǵy 53 nysanda qonys toiy ótedi dep josparlanýda. 1 sharshy metrdiń baǵasy aimaqtarda 140 000, al Astana, Almaty, Atyraý jáne Aqtaý qalalarynda 180 000 teńgege deiin. Eldegi ár iri qalada derlik jańa baspanaǵa qol jetkizgender bar. San jaǵynan alǵashqy úshtik kelesidei: Ońtústik Qazaqstan oblysynda 1630, Qostanai oblysynda 1260 jáne Mańǵystaý oblysynda 1068 páter paidalanýǵa berildi.
Jańa jyl aldynda baspanaly bolǵan baqytty jandardyń biri – Oral qalasynyń turǵyny Gúlmira Muqasheva. Ol Turǵyn úi qurylys jinaq bankindegi alǵashqy depozitin 2011 jyly ashqan eken.
- Ai saiyn keminde 7 000 teńge salyp, banktegi shotymdy turaqty túrde tolyqtyryp otyrdym. Biraz aqsha jinalyp, úi alý týraly oilana bastaǵanda baspana qurylysyna nesie alýǵa bolatynyn bildim. Otbasym úlken, áke-sheshem, men, eki baýyrym bar. Barlyǵymyz bas qosatyn úlken úiimizdiń bolǵany úlken armanym edi. Sondyqtan Turǵyn úi qurylys jinaq bankinen zaem alyp, qurylysty bastap kettik. Qabyrǵasyn kóterip, shatyryn japtyq, bir jyldan keiin ishin árledik, - deidi Gúlmira.
Úi salýǵa arnalǵan nesie maquldanǵan soń ol taǵy bir depozit ashyp, aqsha jinaýdy ary qarai jalǵastyrady. Bir jarym jyldan keiin páter satyp alýshylar pýlyna ótinim qabyldaý jariialanady. Gúlmira Muqasheva 1 bólmeli páterge ótinish beredi.
- Baiqaýdan ótken kezdegi tań qalǵanymdy kórseńiz! Shart boiynsha alǵashqy jarna retinde úi baǵasynyń 30%-na teń qarajat jinaýym kerek edi. Bul – «Nurly jer» baǵdarlamasynyń talaby. Qazir qajet somanyń basyn quradym, tólem qabilettiligin rastadym, barlyq qujatty jinap, áne-mine jańa úige kiremin dep otyrmyn. Jańa jylda jeke páterim bolady, - dep qýanyp otyr bank salymshysy.
«Nurly jer» baǵdarlamasynyń «Jeke turǵyn úi qurylysyn yntalandyrý» atty pilottyq jobasynyń aiasynda Turǵyn úi qurylys jinaq banki jelisi boiynsha 2018 jyly 414 kottedj paidalaýnǵa beriledi. Eń birinshi bolyp Qostanai oblysyndaǵy banktiń 12 salymshysy qonys toiyn toilady. Olardyń barlyǵy da jergilikti ákimdikte jer telimin alýǵa kezekte turǵan edi. Kezekteri kelgen kezde memleket bul salymshylarǵa 10 sotyq jerdi tegin berdi, al sol jerge salynǵan daiyn úidi satty. «Nurly jer» baǵdarlamasynyń sharty boiynsha 1 sharshy metrdiń baǵasy 120 myń teńgeden aspaidy. Jer teliminen úmitkerde kottedjdi óz esebinen satyp alatyn múmkindik bolmaǵan jaǵdaida ol jyldyq mólsherlemesi 5% bolatyn jeńildetilgen zaimdy Turǵyn úi qurylys jinaq bankinen ala aldy. Eń bastysy shotqa úi baǵasynyń 30%-na teń alǵashqy jarna jinaý kerek boldy.
Kelesi jyly Almaty oblysynda 48 kottedj, Jambyl oblysynda 100, Soltústik Qazaqstan oblysynda 72, al Aqtóbe oblysynda 194 úi paidalanýǵa beriledi.
«Nurly jer» baǵdarlamasynyń aiasynda salynyp jatqan barlyq nysandar týraly baspana.kz portalynan bilýge bolady.
