Nur-Sultan qalasy ákiminiń orynbasary Altynbek Qaisaǵaliev biyl elorda aýmaǵynda 350 ga aýmaqqa aǵash otyrǵyzylatynyn málim etti, dep habarlaidy QazAqparat.
«Nur-Sultan qalasy boiynsha búginge deiin 1 millionǵa jýyq túp aǵash otyrǵyzylǵan. Japyraqty jáne qylqandy aǵashtardyń 2018 jyly 19 myń túbi, 2019 jyly 114 myń túbi egildi. Biyl bul jumys jalǵasady. Qalada qazir saiabaqtardyń sany ósip keledi. Biyl arnaiy 50 qoǵamdyq oryn salynýda. Halyq demalatyn ondai oryndarda da aǵash túpteri kúzde jáne kóktemde egiledi. Jyldan jylǵa bul jumysty arttyrsaq deimiz. Eń basty bizdi qýantatyny – Elbasy Nursultan Nazarbaevtyń bastamasymen egilgen jasyl beldeý – búgingi kúni maqtanyshymyzǵa ainalyp otyr», - dedi Altynbek Qaisaǵaliev «ASTANA TV» telearnasyndaǵy Elorda live-ta bergen suhbatynda.
Onyń aitýynsha 1998 jyldan bastap astanany qorshai egilgen qalyń orman qazir qalany bir jaǵynan jelden qorǵasa, ekinshiden aýany tazartyp turady.
«20 jyldan beri otyrǵyzylǵan aǵash túpteri toǵaiǵa ainaldy. Artynsha bul aýmaqty týrister kelip demalatyn orynǵa ainaldyrmaqpyz. Aǵash egilgen 15 myń gektar aýmaq – Nur-Sultan qalasynyń ókpesi dep aitýǵa bolady. 98 paiyzy – japyraqty aǵashtar. Biyl taǵy 350 gektarǵa aǵash otyrǵyzylady», - dedi ol.
