Búgin QR Premer-Ministriniń orynbasary Eraly Toǵjanovtyń tóraǵalyǵymen onlain-rejimde múgedekterdi áleýmettik qorǵaý salasyn jaqsartý máselesi boiynsha Úilestirý keńesi ótti, dep habarlaidy primeminister.kz.
Keńeske QR Parlament Májilisiniń depýtattary, ortalyq memlekettik organdardyń ókilderi, oblys ákimderiniń orynbasarlary, úkimettik emes uiymdardyń jáne qoǵamdyq birlestikterdiń ókilderi, bala quqyqtary jónindegi ýákil qatysty.
«Búgingi kúni Úilestirý keńesi músheleriniń 80% jańartylǵan jańa quramynda jinaldy. Alǵash ret Úilestirý keńesiniń 10 múshesi nemese 25%-y internet-daýys berý arqyly sailandy. Daýys berýge 22 myńnan astam adam qatysty. Bul tiisti máselege qoǵamnyń zor qyzyǵýshylyǵy baryn taǵy bir márte dáleldedi», - dedi Úilestirý keńesiniń otyrysynyń jumysyn ashqan Eraly Toǵjanov.
Vitse-premer Úkimet tarapynan biyl múgedek jandardy áleýmettik qorǵaýǵa 435 mlrd teńge bólingenin, kelesi jyly qarjylandyrý 457 mlrd teńgege deiin artatynyn atap ótti.
Ortalyq memlekettik organdardyń basshylary «Múgedek adamdardyń ómir súrý sapasyn jaqsartý jáne quqyǵyn qamtamasyz etý jónindegi 2025 jylǵa deiingi Ulttyq jospardyń» iske asyrylý barysy týraly baiandady.
Eńbek jáne halyqty áleýmettik qorǵaý ministri Birjan Nurymbetovtyń aitýynsha, múgedekter úshin kásipti tańdaýdyń shekteýli bolýyna bailanysty, Qazaqstanda alǵash ret BUU DB-men birlesip múmkindikteri shekteýli jandarǵa arnalǵan Kásipter atlasyn ázirleý boiynsha joba júzege asyrylýda. Bul jumys berýshilerge, jumyspen qamtý ortalyqtaryna jáne HR salasyndaǵy jeke agenttikterge shekteý túrine bailanysty adamdarǵa qolaily bos jumys oryndaryn usynýǵa múmkindik beredi.
Sondai-aq otyrysta eńbek jáne halyqty áleýmettik qorǵaý ministrligi «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» Zań jobasyn tanystyrdy.
Zań jobasy «halyq únine qulaq asatyn memleket» tujyrymdamasy aiasynda, múgedek adamdardy qoldaý sharalaryn kúsheitý maqsatynda ázirlendi.
Otyrys sońynda Eraly Toǵjanov ortalyq memlekettik jáne jergilikti atqarýshy organdarǵa Ulttyq jospardyń ýaqtyly jáne sapaly oryndalýyn, sondai-aq zań jobasyn ázirleýde qoǵam pikiriniń de eskerilýin qamtamasyz etýdi tapsyrdy.
