Bilim jáne ǵylym ministrligi biyl jańa oqý jylynan bastap pilottyq rejimde 2,5 jyldyq bakalavriat engizedi. Bul týraly vedomstvo basshysy Ashat Aimaǵambetov málimdedi, dep habarlaidy Sputnik Qazaqstan.
Ministrdyń aitýynsha, kóptegen jumys berýshi kadrlardyń óte uzaq – tórt jyl boiy daiarlanatynyna shaǵymdanady. Sol sebepti bilim ministrligi pilottyq rejimde "qoldanbaly bakalavrlardy" daiyndai bastaidy. Biraq tórt jyldyq bakalavriat sol kúii qalady.
"Biz muny biyl jańa oqý jylynan bastaýdy josparlap otyrmyz. Birqatar joǵary oqý ornynda pilottyq joba bolady. Ázirge elorda men Almaty qalalarynyń joǵary oqý oryndaryna engizemiz", - dedi Aimaǵambetov úkimet úiinde ótken baspasóz máslihatynda.
Osy oraida ministr "qoldanbaly bakalavriat" eńbek naryǵyna ne beretinin túsindirdi.
"Qysqa ýaqyt ishinde, iaǵni 2-2,5 jyl ishinde praktikaǵa baǵdarlanǵan maman eńbek naryǵyna shyǵady. Eger ol eki nemese bes jyldan keiin bilimin shyńdap, ári qarai oqyǵysy kelse, ýniversitetke baryp, tolyq bakalavr dárejesin alýǵa múmkindigi bar. Ýniversitetke túsip, ári qarai oqýyn jalǵastyra alady", - dedi Aimaǵambetov.
