Elordanyń sol jaǵalaýynda biyl 4 memlekettik mektep salynady. Bul týraly Nur-Sultan qalasy Esil aýdanynyń ákimi Berik Jákenov aitty, dep habarlaidy "Ult aqparat".
«Biyl Esil aýdanynda 4 memlekettik mektep ashylady. Qazirgi ýaqytta qurylys jumystary qarqyndy júrgizilip jatyr. 2 mektep 1 qyrkúiekke deiin, al taǵy 2-eýi jyldyń sońyna deiin paidalanýǵa beriledi. Memlekettik-jekeshelik áriptestik arqyly da mektep salý boiynsha qarqyndy jumys júrgizilýde. Atalǵan baǵdarlama aiasynda qurylysy júrgiziletin 10 mekteptiń beseýi sol jaǵalaýda salynady», - dedi ol Facebook-tegi Astananyń adaldyq alańy paraqshasynda ótken onlain brifing barysynda
Onyń atap ótýinshe, memlekettik-jekeshelik áriptestik aiasynda josparlanǵan mektepterdiń biri Úrker shaǵyn aýdanynda, al qalǵan 4-eýi Esil aýdanynyń ár jerinde boi kóteredi.
«Olar biregei, jańa formatta salynatyn bolady jáne 2 myńǵa deiingi aralyqta orynǵa shaqtalǵan. Family Village turǵyn úi kesheni tusyndaǵy 1 200 oryndyq mektepti paidalanýǵa berip, jol túsirdik. Ol ótken jyldyń qarashasynda ashylǵanmen kólik qatynaýy qiyndyq týyndatqan edik. Sondyqtan bul bilim ordasy biyl tolyqqandy jumysyn bastaidy. Syǵanaq-Saýran kósheleriniń, Qorǵaljyn tas joly men Shyńǵys Aitmatov kóshesi qiylysyndaǵy mektepterdi de biyl salyp bitirýdi josparlap otyrmyz. Saran shaǵyn aýdanynda da mektep salynady. Biraq, naqty merzimin aita almaimyn. Ókinishke orai, paidalanýǵa berilý merzimi sozylyp barady. Degenmen, merdiger jeltoqsanǵa qarai bitiretindigine ýáde berip otyr», - dedi Berik Jákenov.
