Elorda ákimi Altai Kólginov JEO-1/JEO-2 gazǵa kóshirý jáne ónerkásiptik sektor men eldi-mekenderdi gazdandyrý úshin gaz taratý jelisin salý jumysymen tanysty, dep habarlaidy "Ult aqparat" qala ákimdigine silteme jasap.
Elordany odan ári damytý jónindegi keńeste Memleket basshysy Qasym-Jomart Toqaev qalany gazdandyrý protsesin baqylaýǵa alýdy tapsyrdy. «Elordany gazdandyrý — Elbasynyń tarihi jobasy. Jeleznodorojnyi eldi-mekeninde gazben jabdyqtaýdyń 80% - dan astam taratý jelisi salyndy. Sondai-aq, Kóktal-1, Kóktal-2, Promyshlennyi jáne Agrogorodok eldi-mekenderinde gaz ótkizý jumystary júrgizilip jatyr. Ońtústik-shyǵys (oń jaǵy), Ońtústik-shyǵys (sol jaǵy) yqsham aýdandarynda jumys bastaldy. Kóktal-1, Jeleznodorojnyi eldimekenderiniń áleýmettik nysandary men temirjol jelisin gazǵa jazda qosamyz», - dedi qala ákimi Altai Kólginov.
Ol «Jeleznodorojnyi» eldimekeniniń turǵyndary gaz tartý ekologiiaǵa jaqsy áser etip, jeke sektor turǵyndarynyń ómirin edáýir jeńildetetinin atap ótti.
«Biz aldaǵy jylý berý maýsymynda kómir jaqpaitynymyzǵa qýanamyz. Kómirdi qaidan satyp alý, onyń sapasy, ony qaida saqtaý jaiyn endi oilamaimyz. Jylý berý maýsymynda jeke sektordyń turǵyndary úiden shyǵa almaityn edik. Úide bolmaǵanda kórshilerimiz ben týystarymyzdan peshke kómir salyp berýin suraitynbyz. Endi mundai problema bolmaidy. Sonymen qatar gazdandyrý ekologiiany aitarlyqtai jaqsartady jáne azamattardyń densaýlyǵyna jaǵymdy áser etedi», - dedi Bolat Muqataev. Ónerkásiptik sektor men eldi-mekenderdi gazdandyrý 3 kezeńde ótedi.
Biylǵy jylytý maýsymynda Kóktal-1, Kóktal-2, Agrogorodok, Promyshlennyi, Jeleznodorojnyi eldimekenderi gazben qamtamasyz etiledi. Ońtústik-shyǵys turǵyn úi alabynda jumys bastalady. Ekinshi kezeńde Michýrino, Internatsionalnyi, Kúigenjar (1-2 PK), Telman (3 PK), Prigorodnyi, Garden Village jáne Family Village (4 PK) eldiekenderinde ótedi. Úshinshi kezeńde Ilinka (1-2-shi DK), Shubar (3-shi DK), Óndiris (4-shi DK) turǵyn alaptary gazdandyrylady. Jobany iske asyrý merzimi - 2020-2023 jyldarǵa eseptelgen. Gaz ótkizý aýadaǵy ziiandy qaldyqtyń 6 esege, qatty zattardyń – 40 myń tonnaǵa deiin azaiýyna múmkindik beredi.
