Elorda ákimi Altai Kólginov qala mańyndaǵy eldi mekenderde qandai sharýalar atqarylyp jatqanyn aitty, dep habarlaidy "Ult aqparat".
«Eldi mekenderdi aralap, turǵyndarmen kezdesý kezinde olardyń usynystaryn tyńdaimyz. Máseleniń bir bóligi birden sheshilse, qalǵany josparǵa bekitiledi. Eldi mekenderdi damytýdy 3 kezeńge bóldik. Olar - jol jáne injenerlik infraqurylymdy júrgizý, áleýmettik nysandar qurylysy jáne abattandyrý máseleleri» dep jazady shahar basshysy Instagram paraqshasynda.
Birinshiden, biyl tek eldi mekenderdiń ózinde ǵana 100 kóshe jóndelip, keibireýi jańadan salynady. Ekinshiden, áleýmettik nysandardyń qurylysy (mektep, meditsina ortalyǵy, sport kesheni - ár aýdanda bir-birden) qolǵa alyndy.
«Úsh sport kesheniniń qurylysy bastaldy, sondai-aq eki mektep (Jeleznodorojnyi, Óndiris) salyp jatyrmyz. Sport keshenderinde sportpen shuǵyldanýǵa arnalǵan bólmelerden basqa poshta bólimshesi, politsiia pýnkti, egde jastaǵy adamdarǵa arnalǵan klýbtar, halyqqa qyzmet kórsetý ortalyqtary, kitaphana jáne basqa nysandar bolady. Sonymen birge Prigorodnyi eldi mekeninde 100 otbasyna arnalǵan qoljetimdi turǵyn úi qurylysy júrip jatyr» deidi Altai Kólginov.
Úshinshiden Kóktal eldi mekeninde jylý magistraliniń qurylysy aiaqtalady. Bul Tilendiev dańǵylyndaǵy turǵyn úi keshenderin jylýǵa qosýǵa múmkindik beredi.
Al tórtinshi is - gazdandyrý.
«Biylǵy jylytý maýsymynda Kóktal-1, Kóktal-2, Agrogorodok, Promyshlennyi, Jeleznodorojnyi eldi mekenderi gazben jabdyqtalady. Ońtústik-shyǵys eldi mekeninde gazdandyrý jumysy bastaldy» dep málim etti qala ákimi.
Besinshiden Úrker eldi mekeninde 7 km káriz, 10 káriz-sorǵy stansasy jáne 1 km káriz kollektorynyń qurylysy júrip jatyr.
