Indýstriia jáne infraqurylymdyq damý ministri Beibit Atamqulov Almaty, Jambyl jáne Shyǵys Qazaqstan oblystarynyń joldarynda júrgizilip jatqan jumys barysyn tekserdi, dep habarlaidy "Ult aqparat".
«Qazaqstanda 2020 jyly avtojoldardyń 2600 shaqyrymynda qozǵalys jandanady dep josparlanyp otyr. Mundai mindetti ministrliktiń aldyna Úkimet basshysy qoiǵan bolatyn. Búginde joldardy salý jáne qaita jańartý jumystary elimizdiń ár óńirinde qarqyn alǵan. QR Indýstriia jáne infraqurylymdyq damý ministri Beibit Atamqulov 3 oblys aýmaǵynda joldardaǵy jumys barysymen tanysyp qaitty. Birinshi kezekte ministr «Taldyqorǵan – Qalbataý – Óskemen» avtomobil jolynyń Shyǵys Qazaqstan jáne Almaty oblystaryndaǵy ýchaskelerine bardy. Jol Alakól kýrorttyq aimaǵy mańynda bolǵandyqtan, elimizdiń týristik klasterin damytýda úlken mańyzǵa ie. Biyl avtojolda tolyqtai qozǵalys jandanady dep josparlanyp otyr. Jol 1-shi jáne 2-shi tehnikalyq sanattarǵa sáikestendirilmek», - delingen QR IIDM málimetinde.
Óńirge keletin týrister sanyn arttyrýǵa septigin tigizetin taǵy da bir joba – Qytai shekarasyna deiin aparatyn «Úsharal – Dostyq» tasjolyn qaita jańartý jobasy. Jumystar aiaqtalǵan soń týrister sany ǵana emes, avtokólikterimen júk tasymalynyń kólemi artady. Biyl joldyń 60 shaqyrymynda kólikter júre bastaidy dep josparlanǵan.
Sondai-aq, oblys úshin úlken múmkindikterge jol ashatyn jobalardyń biri – «Qalbataý – Maiqapshaǵai» jolyn qaita jańartý jobasy. Biyl tasjoldyń 415 shaqyrymy kólikter úshin ashylady. Úshinshi tehnikalyq sanattaǵy jol eki jolaǵy bar ekinshi sanattaǵy jolǵa ainalady.
Budan bólek, ministr qaita jańartý jumystary júrip jatqan Jambyl jáne Almaty oblystaryndaǵy «Uzynaǵash – Otar» jolynyń ýchaskelerine baryp qaitty. Jyl sońyna deiin joldyń 56 shaqyrymynda qozǵalys qaita qalpyna keledi degen jospar bar. Sondai-aq, vedomstvo basshysy «Qordai» ótkizý beketin qaita jańartý jumystary barysymen tanysty. Qazir eki eldiń azamattary «Qarasý», «Sortóbe», «Aýqatty» beketteri arqyly shekaradan ótkizilýde. Jańartylǵan ótkizý beketi jyl sońynda paidalanýǵa beriledi. Qaita jańartý jumystary aiaqtalǵan soń, «Qordai» beketi táýligine 50 myń adamdy ótkize alady.
Óńirde «Merki–Býrylbaital», «Kúrti–Býrylbaital» jáne «Balqash- Býrylbaital» siiaqty taǵy birneshe aýqymdy joba júzege asyrylyp jatyr. Búgingi tańda nysandarda qurylys jumystary qarqyn alǵan. Joba elimizdiń ońtústik jáne ortalyq óńirlerin bailanystyryp, olardyń tranzittik jáne týristik áleýetin arttyrýǵa septigin tigizedi. «Merki – Býrylbaital» jolynyń 262 shaqyrymynda qozǵalys biyl ashylýy tiis. «Kúrti – Býrylbaital» jáne «Balqash–Býrylbaital» joldarynda qaita jańartý jumystary aiaqtalǵan soń, Almatydan Balqashqa deiin 4-5 saǵattyń ishinde jetýge bolady.
Eske sala keteiik, biyl qurylys jáne qaita jańartý jumystarymen respýblikalyq mańyzǵa ie avtojoldardyń 4 myń shaqyrymy qamtylyp, onyń 2600 shaqyrymynda qozǵalys jandanady dep josparlanyp otyr.
