Qazaqstanda úiirli shegirtke tektes ziiankester 641 myń gektar alańǵa taralýy múmkin. Bul týraly Úkimet otyrysynda Aýyl sharýashylyǵy ministri Saparhan Omarov aitty, dep habarlaidy QazAqparat.
«Sapaly jáne joǵary túsim alý kóbinese qolaily fitosanitariialyq jaǵdaiǵa bailanysty bolady. 2021 jyly úiirli shegirtke tektes ziiankester 641 myń gektar alańǵa taralýy múmkin. Saiaq shegirtke tektes ziiankesterdiń taralý boljamy – 239 myń gektar. Shegirtke ziiankesteriniń taralý oshaqtaryn anyqtaý úshin 38 mln gektar aýyl sharýashylyǵy jerleri zerttep-qaralatyn bolady. Himiialyq óńdeýge 183 arnaiy tehnika jumyldyrylady», - dedi Omarov.
Onyń aitýynsha, qazirgi ýaqytta Túrkistan jáne Jambyl oblystarynda marokko shegirtkelerine qarsy himiialyq óńdeý júrgizý aiaqtaldy. Italiandyq prýs pen saiaq shegirtke tektes ziiankesterge qarsy himiialyq óńdeý jalǵasyp jatyr. Himiialyq óńdeý joǵary biologiialyq tiimdilikpen ońtaily merzimde júrgizilýde.
«Jalpy 2021 jyly asa qaýipti ziiandy organizmderdiń 3 mln gektar alańda, onyń ishinde dándi daqyldar aýrýlarynyń 1,9 mln gektar alańda, sur dán kóbeleginiń 328 myń gektar alańda taralýy múmkindigi eskerilgen. Aramshóp ósimdikterine qarsy himiialyq otaýdy 7 mln gektar alańda júrgizý josparlanyp otyr», - deli ministr.
